ATHEISM HI |HATPUI THEIH EM?

By Rev. Dr. Ramengliana
Atheism hi khawvel culture zawng zawngin dik anga an nunpui mai hnawlna a ni deuh ber mai a. A chipchiar leh changtlun dan a inang lo a nih pawhin hnam tin hian Pathian hriatna engemaw tak leh chumi behchhana inkaihhruaina (sakhua) chu an nei theuh a. Chumi aia mawl zawk deuh a nih pawhin he hmuh theih khawvel piah lam khawvel hi a awm a ni tih an pawm thin. He rinna tlanglawn ber dikzia chu Richard Dawkins ngei pawhin pawmin, “Khawvel pumpuiah a chipchiar danin ang lo mah se sakhua – hun heh, sum leh pai senna, serh leh sang huathlala tak tak, awihawm lo lutuk leh tangkai lo, hi culture tinah engemaw zawng talin a awm vek,” (Richard Dawkins,God Delusion) tiin chaltlai angreng takin a sawi a. Chuti khawpa chiang chu an hnawl lui chu a ni sia, a sawhkhawk kan tuar meuh ang em le? I han chhui zui lawk teh ang.
Mihring nihphung an zah tawk lo em ni?
Mihringa nihna a tel anga ngaih theih hial ngaihnêp leh hnawl hial hi a fin thlak em? Eng emaw tak chu a awm a ni zawk lo vang maw? Pathian hi awm ni se, amah hriatna hi mihring thinlungah a dah a ni ngei awm si a. Chu chu awm thei turah Atheist ho chuan an ngai duh lo lui a, naturalistic worldview (Pathian tel lo khawvel thlirna) an neih sa tawh avangin chu mi huang chhûngah chuan engmah a leng tawh lo. Mihring nihna an zah tawk lo a ni zawk hial em? Mihringa Pathian hriatna awm tlat hi thilmak angreng tak a ni. Atheist Psychologist Paul Bloom chuan naupang rilru a zirchiannaah zirtir an nih hma hauhvin ‘rilru leh taksa awm a awm hrang’ tih leh ‘siamtu Pathian’ awm ngei rinna an nei nghal mai tih a hmuchhuak a. (Paul Bloom, “Religion is Natural”) Naupangte hi sakhaw thila kaihhruai loh naupang thlan bik an ni lehnghal. Mahse, ani hi chuan evolution kalkawnga thil pakhat lo tel ve palh angah a ngai lui tlat a ni. Atheism hi mi tina thil chiang sa ngawih ngawih che thei lo tura nem beh tum hrâm hrâmna a ang zawk hial mai a ni.
Sensus Divinititus
Kum 500 liam tawhah khan Kohhran Siamthat (Reformation) laia mihrang John Calvina chuan a lehkhabu ropui Institute of the Christian Religion -ah mihringin Pathian a hriat dan chungchang a chhui nasa hle a. Chu Pathian hriatna chu mihring piankena awm ve reng, Pathianin a dah niin a sawi. Hei hi Sensus Divinititus tiin a sawi. Kum za tam tak chu he zirtirna hi an pawm tlangpui mai a ni awm e. Amaherawhchu, khawvel inher zelah mi an lo fekfawn telh telh a, mita hmuh loh, kuta khawih loh, a rim hriat loh thilte chu hnawla inthununtir duh lohna a lo awm ta a. He sensus divinititus pawh hian ngaihthah a hlawh nasa ta hle a. University lamah te chuan Pathian awm ringtu nih pawh hrehawm khawpin Pathian vawrh chhuah tumna leh mihring hriatnaa innghah an tum ta. Pathian rin chu finfiahna awm lo leh tichiangtu hmuh zawh loh a nih avangin finna huang chhunga tel ve tlak lovah an ngai titih ta mai a ni. Kristian mithiamte pawhin chhan vak ngaihna an hriat miau loh avangin an tawmim hman titih a. Chutih laiin mihrang dang Alvin Plantinga lo chhuakin sensus divinititus chu rawn tharthawhin Pathian hriatna chu mihringa ‘basic belief’ a nihna a rawn phawrh leh a. Pathian awm kan hriatna chu midangin rilru ngaihtuahna an neih kan hriat anga hriat mai hi a ni tiin tan a rawn la thar ta a ni. Keimahni rilru ni lo midangin rilru an nei ve tih hi thil chiang sa angin kan pawm mai a, finfiah theih erawh chu a ni miah thung lo a ni. Chutiang chiah chuan Pathian a awm ngei a ni tih pawh hi mihring piankena tel sa ve reng a ni a, miin a hnawl dawn a nih chuan a hnawl chhan finfiahna chu a rawn chhawp zawk tur a ni, an ti ta hial a ni. Mihring hriatna piankena awm sa hi hnawl ngawt chi a ni lem lo.
Atheism a nunpui theih tak tak ang em?
Zawhna pawimawh ber pakhat chu Atheism hi nunpui tak tak theih a ni em? tih hi a ni ngei ang. Atheism thurin hi a tawngchham lutuk a, nunpui tumtute tan a ‘sawp chu nasa tak a ni’ tih khawvel chanchinah a lang a ni. British Journalist ropui Malcolm Muggeridge-an International Congress on World Evangelization, Lausanne hmuna kum 1974-a neihah khan “Living Through the Apocalypse” tih thupui hmangin thu a sawi a. Khawvel chanchin kal tawh a hrût thuak thuak hnuah beidawng aw takin, “Mihring hi amah mai chuan a that theih leh a hmakhua a suih thiam hi ka ring thei tawh lo,” tiin a au chhuak a ni. Tichuan, he thu ril tak mai hi a chhak chhuak zui nghal bawk a: “Without God, we were left with a choice of megalomania or erotomania; the clenched fist or the phallus, Nietzsche or Sade, Hitler or D.H. Lawrence.” (“Pathian a awm lo a nih chuan kan chan tur chu – thuneihna pum hmawmna a nih loh chuan hurherhna vawrtawp; kuttum a nih loh chuan tisa-chakna ; Nietzsche a nih loh leh Sade; Hitlera emaw D.H. Lawrence emaw, te hi a ni mai,” Malcolm Muggeridge, “Living Through the Apocalypse”) Pathian a awm lo a nih chuan tu emaw, eng emaw, kan ‘pathian’ a ngai dawn a ni. Hei hi Biblein fimkhur tura min hrilh reng thin ‘milem biakna’ chiah kha a ni. Miin Pathian awm lova a ngaih theih chuan Pathian a mamawhna thinlung kha a la kian si loh avangin châkna, hurna, ropuina, etc., a ‘pathian’ ta thin a ni.
Khawvel chanchin thlirin a chiang e
Historian Paul Johnson-an hei hi a hmuchiang hle a ni awm e. A lehkhabu pawimawh tak Modern Times-ah chuan Adolf Hitler, Joseph Stalin leh Benito Mussolini te chu kum zabi 20-naa mi tawrawt pathum angin a sawi a. An vai hian Friedrick Nietzsche-a Atheism-in a hrual fe tawh hnu anni. Nietzsche-a hian mi chak lote chu an lâng ang a, mi chak (supermen) te chu tlatlum zel tur an ni, tih philosophy zirtir nasa tu a ni a. Pathian chu hun changkâng tawha a mamawhna kan hriat tawh loh niin a zirtir thin. He superman philosophy hi Hitleran lain Juda ‘men’ ho chu German ‘supermen’ ten tih chimih vek turah a ngai a. Hitlera kutah hian Juda maktaduai 5-6 vel thia ngaih a ni a, (www.genocidetext.net/gaci_holocaust.pdf) amah vanga thi hrim hrim hi maktaduai 21 vel niin an chhût bawk. Ngaihdan eng pawh hian sawhkhawk a nei zel si a. Kristian Apologist Ravi Zacharias chuan, “Hitlera khan Nietzsche-a thuziak leh a philosophy kha lain thisen chhuahna nasa ber, tul lo ber, leh indona khawvel chhiatpui nasat ber a tichhuak a, khawvel kalphung a her danglam hial a ni,” (Ravi Zacharias, A Shattered Visage: The Real Face of Atheism) tiin Atheism leh Nazism inkaihhnawihna a sawi. Communist Joseph Stalin-a vanglai 1931-1953 chhungin mi 3,778,234 an man a, chûng zinga 786,098 kah hlum an nih thu David Hosford leh a thianten an report a (gulaghistory.org/nps/downloads/gulag-curriculum.pdf ) Hitler-an Juda mi a tihhlum aia tam Stalin-an Ukrainian a that, an ti. Kum 1975-a Cambodia ram mipui 1/5 atanga 1/3 suattute kha Angla Leu (The Higher Organization) an ni a. An hruaitu lawk zual 8 zinga 5 te chu France rama lehkha lo zira French Atheist Existentialist Philosopher Jean Paul Sartre, “thil khap hi khap a ni,” tih lo zirtir thintu zirtirna lo tuipui tawh an ni. Atheism hi chu a hlauhawm thlawt a ni.
I khawvel thlirna khan sawhkhawk a nei
Adolf Hitler-a leh Stalin-ate nun rawng lutuk chhan kha Atheism vang a ni chuang lo tiin New Atheist hovin sawi an chîng hle. Hitlera khan Catholic kohhran member a nihna atangin a lo inbân bik chiah si lo. Atheist zawng zawng hi khawvel tehfunga mi sual tak an ni lem lo tih chu a chiang a. Amaherawhchu, Atheism hian a ‘ideology’ thuneihna a kalpui hun hun chu a hlauhawm hun a ni maiin a lang thin. Hemi chungchângah hian David Berlinski-an a chhang hneh hle: “Hitler-an a pawm loh, Stalin-an a pawm loh, Mao-an a pawm loh, SS hovin an pawm loh, Gestapo ten an pawm miah loh chu….Pathianin a hmu reng tih kha a ni,” (David Berlinski, The Devil’s Delusion) tiin. Kan rin dan, ngaihdan leh thlir dan hian sawhkhawk a nei zel si a nih hi. Pathianin mihringah amah hriatna rilru a lo dah a, chu chu rap beta Pathian a awm lo ang hrima khawsak hi a him lo hle a, a hlauhawm a ni. Pathian kan hnawl chuan a hmun chu thil dangin a luahlan thin a, chu chu mihring tuar zawh rual a ni lo. Pathian a awm a ni tih pawmtu Theism thung hi chuan mihring nihphung awm sa hi a nunpui mai a, Pathian a a awm a ni tih leh mihring mihrinna hi a inhmehin a kal kawp tha thlawt a ni.