US document pawimawh tiputrutu nia ngaih man

Ukraine war leh US national security kaihhnawih thil pawimawh tiputru tua nia ngaih kum 21-a upa US airman chu court-ah inlan tura tih a ni.
Jack Teixeira chu FBI ten Massachusetss a thingtlang khua Dighton-a an chenna Inah Ningani khan an man a. Teixeira hi online chat group heng document pawimawhte phochhuak hmasa bertu leader nia sawi a ni.
Phalna nei lova classified information thehchhuaktua puh niin Boston, Massachusetss court-ah inlantir nghal tur a ni a. Tun hnaiah Ukraine indona kaihhnawih te American allies te chungchang document te chu a putru a, Washington tan chuan zahna tawpkhawk a ni bawk.
Texeira hi western Cape Cod a Otis Air National Guard Base a Massachusetts National Guard a intelligence wing IT specialist a ni.
National Guard te hi US Air Force reservist wing an ni a, military full time employee an ni lova, mahse, a tula khawi hmunah pawh sawn theih an ni thung.
Texeira an security clearance a neih theih chin hriatfiah theih a la ni lo va, a landan chuan tuna document putrute hmu thei tur chuan single scope background investigation (SSBI) ah a thawh a ngai tih a ni.
Heng intelligence material pawimawhte hi chat room group pawna thawn darh a nih hma chuan Pentagon official te pawhin a putru tih an hre miah lo bawk a. Texeira hi sorkar hmalak dana lawm lohna a neih rualin a thiante chuan whistleblower emaw foreign agent ni thei chi a ni lo an ti thung.
Pentagon chuan classified information puhruk dan leh chhan chu an enfiah tur thu sawiin mahse US military chuan service member la thalai zawkte laka rinna nghah chu an kalsan sa a ti thung.
US Attorney General Merrick Garland chuan Teixeira chu man a nih thu sawiin thu zawhfiah tur a ni ang tih bak engmah thil dang sawi a nei lo va defence department thupuangtu Brigadier General Pat Ryder thung chuan document putru chu ‘tihluih leh criminal act a ni’ tiin a sawi thung.
Kum 22-a upa Eddy Souza Teixeira nena school khata kal thin chuan a classmate hlui chu naupang fel, buaina siam ngai lo, ngawi chawi tak a ni a, naupang thil tihsual a ni ang tiin a sawi.
Teixeira hi Discord chatroom pakhata group leader niin chutah chuan member an awm nual a, movie enhona hmun te niin member zingah Russia leh Ukraine mi te pawh awmin Europe, Asia leh South America mi leh sate pawh an awm a ni.
A tirah chuan an chatroom-ah bak document te chu post a ni lo va, March thla tir lam tang khan member-te chuan Discord server dangah post darh tanin a hnuah game Minecraft leh Filipino YouTuber ten an post darh leh zui a ni. Chumi hnuah Telegram chat app thlengin pro-Russian channel-ah te post darh a ni zui ta a ni.