Atletico Madrid in Julian Alvarez an la lut

Spanish club lian Atletico Madrid chuan Argentina forward Julian Alvarez chu £81m sengin an la lut
Atletico Madrid hian an player thar Alvarez hi kum ruk daih contract an ziahpui. Alvarez manah hian City hnenah £64.4m (75m euros) an pe phawt dawn a, £17.1m (20m euros) zet pek belh leh an ngai dawn. City-ah hmun a chan tam theih loh vangin Alvarez hian khelhna hmun tur pan a duh a. Atletico Madrid hian lak ngei tumin tan an khawh a, an la fel thei ta nge nge a ni.
World Cup leh Copa America-ah Argentina an champion theih nana player thawhhlawk Alvarez hian kum 2022 khan River Plate atangin Manchester City a zawm a, City hian Alvarez lak nan £14.1m an seng. City tan hian inelna hrang hrangah vawi 106 a khel a, goal 36 a thun. City tan khel chhe lo viau mah se goal thun thei tak Erling Haaland chu a tan nekchhuah rual a ni lo. Haaland a awm miau vangin bench-ah hun a hmang tam hle. Bench-ah hun a hmang tam a, inkhel pawimawh a hmachhawn loh fo vangin City chhuahsan duhna lian tak a nei a, a khelh tam theihna tur a pan ta a ni.
Alvarez hi Manchester City in an player hralh to ber a ni a. Chelsea hnenah £50m-a an hralh Raheen Sterling record a khum.