ATP ranking lerah Djokovic kirleh

ATP ranking lerah Djokovic kirleh
Thawhtannia mipa tennis ranking thar tarchhuahah Miami Open semi-final paltlang zo lo Carlos Alcaraz chuan number one nihna humhim zo loin Novak Djokovic bawk ATP ranking chhipah a kirleh.
Chawlhkar 377 chhung zet World No.1 ni tling chunga hmeichhia leh mipa thliar loa a chawlhkar zawnga number one ni rei ber record kawl rengtu Stefanie Graf khumtu Serbian great hian world number one ni chunga a chawlhkar 381-na a hmang chho mek a, April ni 9 atanga khelh tan tur Monte-Carlo Masters behchhan hian ATP Tour-ah a kirleh ang.
Clay season-ah No. 1 nihna hi a chelh rei dawn em a hriat loh a, a paihthlak leh tak Alcaraz nen point-a an inthlauhna (380) hi a chhah lo em a, Spaniard Alcaraz pawh hi Monte Carlo-a kirleh nghal turin a inbuatsaih mek a, he hmunah hian No. 1 ranking neihlet leh theihna hun remchang a nei dawn a ni.
Chawlhkar hnih pawh tling loah khan Alcaraz hian ATP ranking-a sang ber Djokovic hmakhalhin num-ber one nihna a luah chho a, Indian Wells Masters final-a Daniil Medvedev hneha a career-a ATP Masters 1000 title pathum a lak tlinna ken tel point hmang khan ranking-ah a sang ber luah bawk mah se Miami khaw tournament lamah a No. 1 nihna humhim turin semi-final pawh a paltlang zo ta si lo a, Spaniard mawngphe hmu pha reng chunga a hum ngai luah leh hun chang ve reng Djokovic chuan a rawn hmakhalh leh ta nge nge a ni.
Spaniard rawlthar kum 19 mi Alcaraz hi 2022 US Open title a lak rual khan ATP history-a world No. 1 ni thei naupang ber lo ni tawhin, khami kum khan hliam avangin mipa season kharna ATP Finals lamah inlan thei ta lo mah se No. 1 atangin a tlahniam leh ta lo a, number one ni chungin kum a hmangliam.
Kum a lo thar a, Australian Open champion Novak Djokovic chuan a rawn luahlan tak avangin World No. 2-ah a tawlh thla a, tunah pawh Serb avang bawkin number two lamah a chhuk leh ta rih a nih hi.
A career la naupang takah Alcaraz hian chawlhkar 21 chhung zet World No. 1 nihna a chelh tling der tawh a, number one ni thei player 28 awm tawh zinga ranking-a a sang ber nih rei lamah 16-na a ni pha.