Lunglei MLA palite’n mawng sawh dawp

Lunglei MLA palite’n mawng sawh dawp
Lunglei Municipal Council (LMC) inthlanah state-a sorkarna changtu MNF an ‘nil’ a, MNF hi an chak lo a ni mai lo, Lunglei MLA palite’n mawng an sawh dawp tih hi inthlan thlirtute thlir dan a ni.
Thu dawn danin, LMC inthlanah khan MNF Sub Headquarters, Lunglei huam chhunga MNF mi leh sate an phur lo a, an campaign hlei thei lo.
Lunglei-a pawl hruaitu pakhat chuan MNF hi an an phur har tih a sawi a, minister Lalchhandama Ralte leh Robert Romawia Royte te Lunglei-a an kal khan party-ah awmzia a awm deuh a, chumi hnua minister Lalruatkima zin khan awmzia a nei leh chauh tiin a sawi.
Lunglei khawpuiah MLA bial pali a awm a, MNF bial vek a ni. MLA palite hi tun hnaiah mipuiah an tla na lo a, an party-ah ngei pawh an tla na lo nia sawi a ni.
Lunglei khawpuia MNF mi leh sate hi campaign turin an phur lo a, an MLA-te laka lawm loh vanga phur lo an ni nawk nia sawi a ni. Minister Lalruatkima’n engemaw zat chu a va chawk tho a, mahse a tir atanga theihtawp chhuah an nih loh avangin tlinna tur khawpin awmzia a nei hman lo tih thu dawn a ni.
Aizawl atanga Lungleia campaign-a kal, MNF mi pakhat chuan, “Kan MLA-te lakah mipui an lawm lo a, party mi pawh an lawm lo a, phur taka campaign a awm lo tluk a ni,” a ti.
MNF campaigner pakhat chuan Budget Session liam taa Dr Vanlalthlana’n Lunglei MLA-te Lunglei tana au lova a puhna khan Lunglei mipui rilru a hneh tih a sawi a, “Kha khan Lunglei MLA-te a tihniam em em a, campaign lai khan sawi fiah ngaihna a awm lo. Dik tak chuan Dr Vanlaltanpuia pawhin Lunglei kawng chhia chungchang pawh a changtu chief minister tan a ninawm ang tih tur khawpin a sawi fo a, mahse Dr Vanlalthlana thusawi khan chung chu a hliah vek,” a ti.
MNF vice president a nihna atanga Dr R Lalthangliana chawlhtir a nihin Lunglei-ah nghawng a nei bawk nia sawi a ni a, hei hian Lunglei mipui engemaw zatah MNF boruak a tihniam nia sawi a ni.
MNF hi nikum lam atangin Lunglei-ah an inrem fuh thei lo a, MNF Sub Headquarters hruaitu an inthlak sek. Party chhungah neuh neuh an nei a, chu chuan party a nghawng bawk tih thu dawn a ni.