Attendance lakna rintlak pawm vek

Sawrkar office-ah biometric attendance system chauh ni lo, attendance lakna dang pawh a rintlak chuan pawm vek a ni tih chief minister Lalduhoma chuan a sawi.
General Administration Department changtu ni bawk Lalduhoma’n zawhna a chhan danin, GAD Secretariat Wing chuan biometric attendance system hi Mizoram Secretariat-a sawrkar hnathawk zawng zawng hman turin hma a la mek a, a hmawr an bawk chho mek tih a sawi. Department hrang hrangah district level thlengin hman chhoh zel tura ruahman a ni tih a sawi bawk.
Zawhna dang chhangin, biometric attendance hman hnu in office kaite ah danglamna a thlen hle tih a sawi a. He system hi a hautak a, sum sen a san avangin department thenkhat chuan sum sen vak ngai lo chi an ngaihtuah a, a that tho avangin an pawm tih a sawi.
“School Education department-ah chuan QR code (Kai) hmangin, school huamchin kha ‘geo fencing’ an ti a, hemi chhunga awm tan lo chuan attendance a pek theih loh. A application hi google playstore-ah dahluh a ni tawh a, dashboard atangin minister leh secretary ten zirtirtute leh an staff te attendance kha awmhmun atangin an hmu vek thei a, department dang pawhin hetianga tha tho si, a tlawm zawk an hmu a nih chuan pawm a ni vek tho,” chief minister hian a ti.