Audio/video lei leh hawh theihna tur app siam thar

Audio/video lei leh hawh
theihna tur app siam thar
Online streaming application ‘Thulkhung’ chu Nilaini khan chief minister Zoramthanga’n a tlangzarh.
Information & Communication Technology department hnuaia Mizoram State e-Governance Society (MSeGS) leh Music Domain Mizoram (MDM) tangdun siam Thulkhung app hi audio/video lei emaw hawh (rent) theih tura duan, zaimite’n an music video leh hlate mipui lei theih turin man tlawmtea chhawpchhuahna a ni.
He application hi mobile phone leh computer-a hman theih a ni a, digital goods e.g music video, films, audio hralh theihna tura platform a ni. Audio/video lei emaw hawh theiha chhawpchhuahna, Android/Apple phone app leh internet browser hmangtea access theih tur a duan a ni.
Thulkhung chhunga digital goods zawrh chhuahte hi a hmangtute tan a awlsam zawk theihna’n CDN (Content Delivery Network) hmanga deliver a ni a. Internet tha lutuk lo ah pawh buaina awmlo tura duan a ni. Video content (music video & film) bikah phei chuan an network azira video quality inthlak theia siam a ni.
Security chungchangah Thulkhunga digital goods hi DRM (Digital Right Management) technology hmanga thuam niin, screen record, screenshot leh content edit leh forward lakah a him a, content piracy laka him tura ngaih a ni. Audio bikah chuan AWS signed URL technology hmanga content security hi thuam a ni. Storage-ah chuan khawvela cloud computing tha leh rintlak ber AWS cloud server hman a ni a, performance tha thawkhat tura ngaih a ni. Storage-ah hian AWS Simple Secure Storage (s3) hman niin, thulkhunga digital content hi him tawk hle tura ngaih a ni.
Lei leh hralhna atan India rama payment aggregator lian ber – Paytm, Payment Gateway hman a ni a. UPI, Netbanking, Debit Card, Credit Card te hmanga content te hi lei leh hawh theih a ni.
Chief minister chuan entertainment khawvelah hma sawn tura tan lak zel a pawimawh tih a sawi a. Khuallian chuan mihring chu khawvela kan hun neih tam zawk chu hah taka hnathawhna’n kan hmang thin a, taksa leh rilru a lo hahdam theih na’n entertainment a tul thin tih a sawi. Tunlai technology hmasawnna rual pha tura hma sawn theih ve zel chu tha a tih thu sawiin, kum reilote chhunga media technology hmasawnna in nunphung a thlak danglam dan te, awlsamna nasa tak a siam dan te a sawi a. Heng hmasawnna hi a tha zawnga hman thiam zel a pawimawh thu a sawi a ni.