August tawp lamah health care scheme thar hman theih tum – Health minister

Kumin August thla tawp lam hi chuan, mi pakhat tana cheng nuai thleng bill theihna Universal Health Care Scheme kalpui hman theih tura chhawpchhuah tum a ni tih Health & Family Welfare minister Lalrinpuii chuan a sawi.
Zirtawpni zinga Lawngtlaia damdawi in pathum – District Hospital, Lairam Christian Medical Centre & Hospital (LCMC&H) leh Christian Hospital Lawngtlai a tlawhnaah Health minister hian, Universal Health Care Scheme chu mi zawng zawng huap tura duan niin, cheng nuai 5 thleng bill theih ani dawn a; Health Care Society-in a enkawl dawn tih a sawi. Health Care Scheme thar hlawhtlinna turin kohhran damdawi in leh mimal damdawiin an pawimawh hle tih sawiin, private hospital-te nen indawr mek a ni a, kohhran damdawi inte chuan tha taka tawiawm turin a ngen tih a sawi a ni.
Mizoram health care system chu thapui thawha siamthat a ngai a, sawrkarin theihtawp a chhuah mek tih Lalrinpuii hian a sawi a. Natna khirh bik enkawlna (Critical Care Unit) ang chi nei ve thei tura hma lak a tul, tiin, a bikin lung zai ngai (heart surgery) ah sum tlem zawk senga sawrkar damdawi ina zai theih thuai a beiseiawm tih a sawi. Kal thlak pawh tih theih thuai a ni dawn a; rethei zawk, phai lama kal thei loten an hlawkpui dawn hle tih a sawi. In vitro fertilization (IVF) ti tura phai pan reng ngai chu Mizorama tih ve theih thuai a beiseiawm tih a sawi bawk.
Sawrkarin kohhran damdawi in a ngaipawimawh takzet tih minister hian sawiin, “A theihna apiangah sawrkar chuan a tanpui zel dawn. Private hospital-ah damlo inenkawl man a sang hle a, kohhran damdawi inah erawh man tlawm zawka inenkawl theih a nih avangin sawrkarin a thlamuanpui hle,” a ti.