Australia tui lianin chhiatna thlen nasa

Australia tui lianin
chhiatna thlen nasa
Australia-a tui lian chuan Queensland hmar lama hmun hrang hrangah ‘chhiatna nasa tak’ a thlen niin an state premier chuan a sawi a, hetih rual hian an beisei ai hmain thil lawmawm lam a awm leh hma niin a sawi.
Thawhlehni khan chenna in chhuahsan sang tam tak chu an in lamah an let leh tawh hlawm a, chutih rual chuan chenna in leh sumdawnna hmun tam tak chu tuiin a la chim a. Hmeichhe pakhat thi a awm tawh.
“He chhiatna hi mipuite dawhtheihzia fiahna tur a ni,” tiin Queensland Premier David Crisafulli chuan ABC a hrilh.
Queensland hmun thenkhatah hian Inrinni atang khan ruah surin m 2 dawn a sur hman a, tui tilianin power a awm lo nasa hle a; mahse, premier chuan Thawhtanni zan atang khan a ziaawm tan niin a sawi.
Townsville-ah chuan Thawhlehni khan ruah a sur tawh lo va, khua erawh a la thiang lo hle a, tui lian chu a sang zawngin a kal tawh loh an ring.
“Hlauhawm chu a liam ta niin kan hria,” tiin Townsville Local Disaster Management Group chair Andrew Robinson chuan a sawi a. A hma khan chenna in 2,000 vel chu tui lianin a chim thei niin an sawi lawk a ni.
State hmar lam lehzual, Ingham leh Cardwell-ah te chuan power a awm loh avang leh kawngpui a pin nasat avangin eng ang chiahin nge chhiatna a thlen an la hre thei lo thung.
Crisafulli-a chuan an hriat theih chinah chuan ‘a nasa’ niin a sawi a. “Mite chu an inah an awm thei lo va, an sumdawnna leh an lovah pawh an awm thei rih lo,” tiin Thawhlehni khan a sawi.
Pathianni khan pitar kum 63 mi chu State Emergency Service (SES)-in chhanchhuah an tum laiin an lawng a let avangin a thi.
Hmun 8,000 chuangin power an la nei lo va, kawngpui a chhiat nasat avangin a tuar na lai tak tak tlawhpawh an la harsa rih.
Crisafulli-a chuan a ngai ang ni leh tur chuan hun a duh rei dawn tih a sawi a, sipai chakna nen power generator hmanga power siam an tum tih a sawi.
Ingham-a damdawi inte chu dan pangngaiin an kal leh thei tawh a, supermarket leh petrol station pawh an kal pangngai leh tawh.
Queensland hmar lam hi a awmna hmunin a zir avangin khuarel thil na tak tak – cyclone, ruahpui leh tui lian thlen duhna hmun a ni.