Indona avanga Gaza-a thi 67,000 dawnah tipung

Indona avanga Gaza-a thi 67,000 dawnah tipung
Gaza-a thuneitute chuan Israel-in a rûn avanga thi chu ennawnin mi 61,709-ah a tipung a, mi sang tam tak chin hriat loh chu thiah an telh thar a ni.
Gaza Government Information Office hotu chuan thuthar lakhawmtute a kawmnaah Palistinian thah tak 76%-te ruang chu hmuh tawh a nih thu leh damdawi ina lak a nih thu a sawi a. Hetih lai hian mi 14,222 vel in chim leh chhe kara la awm emaw, chhanchhuah hna thawktute pawh phak lova awm an la awm thu a sawi.
Gaza City-a al-Shifa Hospital-a thuthar lakhawmtute a kawmnaah hian Salama Maarouf chuan thi zinga 17,881 chu naupang an nih thu leh an zinga 214 chu piang hlim an nih thu a sawi bawk.
“Mi maktaduai hnih chuang chu loh theih lohva tlanchhiat ngaiin an awm a, an zinga tam tak hian ni tin khawsaknaa mamawh thil an tlachham a ni,” a ti a. Indona avanga hliam tuar mi 1,11,588 an awm bawk niin a sawi.
Gaza-a indona hi October 7, 2023-a Hamas-in Israel an beih atanga intan kha niin mi 1,200 chuang thatin mi 251 chu hren turin Gaza-ah an hruai a. Israel hian Hamas chhut chimih tumin Gaza a rûn zui a, thla 15 zet an beih hnuah thla hmasa tawp khan inkahhai an puang.
Inkahhai puan mek hi thawh khatna niin March thla tir thleng awh tura beisei a ni a, Palestinian chhanchhuah hna thawktute tan a hmaa an thlen theih loh hmunte an thlen theihna hun remchang a ni ang.
Maarouf-a chuan thihna hi damdawi ina thawk, mi tanpuitu leh chanchinbua thawkte pawhin an tawk nasa niin a sawi a. Damdawi a thawk mi 1,155 vel, chanchinbu mi 205 leh vantlang tana thawk mi 194 an thi tel niin a sawi.
Inkahhai thawh hnihna atan inbiakna tan leh hnaih a ni a, thawh thu thlenga inkahhai hi puana indona tihtawp tum a ni.
Palai hna thawk mek – Qatar, Egypt leh United States chuan inbiakna hi an kalpui leh tan dawn a; mahse, Israel leh Hamas hi an inrem thei lo a nih chuan March atangin an indo leh dawn tihna a ni.
Washington, DC tlawh mek, Israeli Prime Minister Benjamin Netanyahu-a chuan President Donald Trump hmuh a tum a. Ani hi an rama hnam la vawng pawl a thawhpuite chuan inkahhai hi titawia indo chhunzawm leh turin an nawr na hle.
Israeli thuneitu dang leh Hamas hruaitu eng emaw zat nena indonaa dan pela an chea puh avanga International Criminal Court-in a man duh zinga tel, Netanyahu-a hian Trump-a nen hian ‘Hamas laka hnehna chana mi hren mek chhuah vek dan tur leh Middle East-a Iranian thlawp firfiakte chhut chimih dan tur’ an sawi dun dawn tih a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More