Australian Open-ah Djokovic leh Murray thawkdun dawn

‘Big Four’ player an tih zinga professional tennis la chawlhsan lo awmchhun Novak Djokovic chuan nakkum Australian Open hmachhawn tura a inbuatsaihna kawngah a elpui lian ni thin pali zinga pakhat Andy Murray chu coach atan a ruai dawn.
|um thum lai Grand Slam champion ni ve tawh Murray hian kumin August thla khan kum 19 lai a lo buaipui ve tawh tennis inelna a chawlhsan a; tunah kum 37 mi niin, Serb nena inremna an siam hnuah world number one hlui hian Novak tana danglamna thlen tura net lehlama tandun hun a nghakhlel tawh tih a sawi.
Djokovic leh Murray hi tun season chawlh lai atang hian kumthar January ni 12-26 chhunga Melbourne Park-a khelh tur kum khat chhunga grand slam tournament hmasaber atan an thawkdun tan dawn a; tun hi tennis khelh a chawlhsan hnua Briton Murray-a’n coaching hna a thawh vawikhatna tur a ni.
Mipa tennis player zinga Grand Slam champion tum 24 ni tling thei awmchhun Djokovic hian a career-ah record siamin Australian Open title 10 a la tawh a; Melbourne final-ah Murray hi vawili a hneh tawh a ni.
Australian Open-ah hian a champion leh a nih chuan kum 37-a upa ni tawh Serb Djokovic hian Australian legend Margaret Court-i nena major singles title la hnem ber an nih dun mekna atangin record a malkhalh thei tawh ang.
Kumin hi Djokovic-a tan kum chhia niin, grand slam tournament paliah a champion zo lo fai vek a, kum 2017 hnu lama major title pakhat mah hawn loa kum a khar vawikhatna niin, Australian Open semi-final lamah world number one Jannik Sinner hneh loin a tlawm a, Wimbledon final-ah Carlos Alcaraz a hneh lo leh bawk.
Paris Olympic Games-ah erawh hun rei tak a lo nghah tawh hlawhchhuakin a vawikhatna atan Olympic gold medal a dawng a, kha kha a hlawhtlinna ropui ber tiin a sawichhuak hial nghe nghe.
Briton chawlh hma khan Murray leh Djokovic hi tour-ah thian tha tak ni chhoin, junior level atanga inel ngat ngat tawh an ni bawk a, an inhrechiang thawkhat tura ngaih a ni a, pakhat zawkin tennis khelh a bansan hnuah pawh an thawkdun zui leh dawn ta a ni.
An pahnih head-to-head record (25-11)-ah Djokovic chungnung zawk mah se kum US Open bakah a kumleh Wimbledon title a lakna kawngah Murray khan Serb a hneh ve tlat a ni.
Chutih laiin Melbourne Park-a final lianah 2011, 2013, 2015 leh 2016 khan Djokovic ngam loin Murray a tlawm a; kum 2016 French Open final-ah pawh chuti bawk.
Match 24 tehreng a chak zawn avangin 2016 season tawpah Djokovic lehpelin Murray chuan world number one dinhmun a luah chho a, mahse, a kumlehah khel bawr nain a tibuai zui ta tlat a, chu chuan a career pawh a tihtawi phah ta hial a ni.
Murray hian kumin Paris Olympics kha a tournament hnunghnungber a nih tawh tur thu sawiin, men’s doubles lamah a kawppui Dan Evans nen quarter-final an thleng a, medal awrh chungin tennis a chawlhsan thei ta lo a ni.