Auto rickshaw permit pek chhuah duh loin office dang

Kolasib Auto Rickshaw Drivers Union (KARDU) in Kolasib khawchhunga auto rickshaw permit pekchhuah tum cancel phutin Thawhlehni khan District Transport Officer Kolasib office-a thawktute kal tur an dan chu an chhunzawm zel.
KARDU president Ramfangzaua Ralte chuan auto rickshaw permit pekchhuah hrim hrim hi an dodal a ni loa, eizawnna atana mamawh ngawih ngawihte permit an pe pawh tha an tih thu a sawi. Tun tuma permit an pek zingah hian sawrkar hnathawk te, rorel lai party Block hruaitu, in leh lo tha tak tak leh excavator nei pha hialte leh eizawnna atana auto rickshaw permit mamawh miah lo tih chiangsa te an tel tih sawiin, “Induhsak uchuak leh a mamawh lo te hnena permit inpek hi a tha kan ti lo,” a ti.
Hei bakah hian permit an pek zingah chhungkhat atanga pahnih hmu, pafaa hmu, unaua hmu, auto pickshaw permit pahnih nei tawh sa pek leh pawh an awm tih sawiin, a dinna tur stand-ah dinna an inchan tawh loh lai a, a ruala permit 112 pek hian auto rickshaw hmanga eizawngtute tan harsatna a siam nasa dawn tih a sawi a ni.
KARDU hruaitute chuan an lungawi lohna thu hi chief minister hnenah an thlen tawh a, CM hian an nawrh titawp turin a lo ngen a. An thil phut engmah a hlawhtlinna lam hawi a sawi loh avangin an hmalakna kalpui mek chu tih tawp chi ah an ngai lo tih an sawi.
KARDU hian auto rickshaw permit mi 112 pekchhuah avanga an duhlohna lantir nan August 24 atang khan Kolasib DTO office-a thawktute office tur hi an dang tan a; an beisei anga chhanna an hmuh hma chu tiamchin awm loa dan zel an tum tih an sawi a ni.