By MC. Lalthianghlima
Tun hunah hian kan ram hi “A chhe ta vek e” kan ti hauh lo, nimahsela zêp leh phat rual lohvin kan ram hi a chhe mêk tih erawh kan pawm emaw pawm lo emaw, kan nihna dik tak a ni. Chu ram “Chhe vek” ni lo “Chhe mêk” chu tuam dam a, siam tha turin tunah hian mei kawha chêt lâk a ngai kan ti a ni zâwk.
Heti êm êm a corruption-in min tuam hnehziate leh mipui-in kan chanvo dik tak tur hmu lova, mipui sum tih chingpen a tam ziate leh a dik a dawk pawh thlu hlei thei lo khawpa party politics kan ruih chilh nasat ziate. Kohhran pâwl ram (Denomination) kan ruih chilh nasa êm êm-te hi, kan chhiat mêkna langsar zualte chu an ni, hei hi thu dik tak mi tam takin an sawi duh loh keini mi â deuhte’n kan sawi duh chu a ni ve tlat thung si.
Corruption han tih hian, kan politician chhe mi-te chauh kan kawk thei bîk lovang, sorkar hnathawk eiruk chîngte leh ram mipui mahni hma a chhuak eiru-a, ti chingpen hreh miah lote pawh kan huamtir vek a ngai ang. Kan politician leh sorkar hnathawk leh ram mipuite zingah hian, ram hmangaih vang leh Pathian zahna avanga dik taka ti leh eiru lo tam tak an awm tih chu kan hria a lawm. Nimahsela heng mite zingah hian chinghne koham an sawi ang mai a, a dik leh dik lo, a mâwi leh mâwi lo pawh dâwn zo lova mahni hma a chhuak apiang ti khaw lova, ti chingpen duh hi kan kawl nual mai âwm mang e. Man chhuah a, thiam loh chantir an nih ngawt loh phei chuan, zahna reng reng an nei lo lehnghal. An mihringpui, an hnampuite chanvo heti taka an suasam duh hi thil mak satliah a ni lova, a râpthlak zâwk a ni. Siamtu Pathian leh an mihringpuite hmai êng an zah hauh lova, ka theih tak emaw tiin an la uangthuang êm êm zâwk a ni âwm e.
Ram mipuite chanvo, ram tâna hmasâwnna hnathawhna tur sum eiru tur a politician leh sorkar official inthurual in awm em? In lo awm a nih chuan ram neitu kan Pathian leh a chhûnga chêng in mihringpui, in hnampuite hmai êng zahna chhe tê tal nei ula, sim mawlh teh u. L.Keivom (R.I.P) a’n “Chuti chuan thamna chu lâwmman vuahin, an silfai chawp a” a tihte zîngah khân in lo tel ve palh hlauh ang e.
Politician inti, politics hi sumdawnna hmunpui emaw ti tlat leh dik lo taka thiltihna hmun emaw ti a, politics mual tibaltu kan awm em? Chutiang mi chu kan awm a nih chuan politics hmai ti mâwktute in ni tih hriain, chawlh kan puansak a che u. Politics in tih leh politics kan tih hi a inang lo, bazar lûn tak ang mai a sumdawnna leh a ngam ngam eirûkna hmun tur a ni lo, ram kalsiam rêlna hmun, ram siam thatna hmun tur a sin.
Kan natna hi a thûk lutuk Kohhran pawh kan inen fiah a, kan inlamlêt a, kan tih dik lohnate kan insiam that ngam a hun viau. Kan Kohhranah hian kan Lal Isua hian Lalna leh thuneihna hi a chang zîktluak zêl em? Pathian ai hian kan Kohhran Upa sorkar hnathawk lian deuhte leh Kohhran hruaitu hausa deuhte hi kan dah Lal-in, kan hlau zâwk fo em? Heng kan miliante hi kan Pathian biak lo chauh tawh em?
A lang apâuva che si lo hian, kan Kohhranah nihna leh chanvo kan khêl na ta lutuk em? Kan rawngbâwlna kan kalpui dan leh kan Pathian biak inkhawmah te hian kan Kohhran member tlêma khawsak harsa deuhte inthlahrunna rum rum tur thil kan ti fo em? Pathian thlarau thianghlim hriakthih ni lo, an neih-nun leh pawisa ngah deuh kan tlawn luât avanga Kohhran hruaitu-a thlan tlin kan ngah ta lutuk em? Kristian vânram kai tum vek kan nih rual hian, Kohhran pâwl ram (Denomination) hian min va ti â nasa tehlul êm. Ramthim chu sawi loh, helai khaw khat/veng khata chêng ni si denomination in a bual ât kan tam lutuk lo maw?
Kohhran programm lian thamahte hian sorkar pawisa rinchhanin ruahmanna kan siam fo a nih chuan, kan Kohhran hi a kalsual mêkah ngai ngam ang u. Sorkar hian kan inkhawmpui lianah pawisa leh eng eng emaw min rawn pe pawh ni sela, chutiang thil chu ram mipuite ta a sin, ram hmasâwnna atâna thawhna tur a ni. Sorkar budget ah hian Kohhran inkhawmpui pual leh Kohhran bil chanvo engmah a awm lo.
Kan rama thil dik lo tam ta lutuk do ngam tur leh siam that hna thawk tur hian, chêt lâk thuai thuai a ngai takmeuh a ni. A huho ni lo, mahni chauh pawha dikna kan dinpui ngam a ngai ta a nih hi. Thil dik lo kan bitum avang leh dikna kan dinpui tlat avanga mite sawichhiat leh do rawn kan tâwk a, mite huat kan lo hlawh a nih pawhin huai taka ding ngam kan mamawh a ni. Kan ram hi a chhe vek lo va, a chhe mêk tih erawh kan pawm ngam a, siam tha tura thawh chhuah a hun ta e.
Zoram mipuite, kan harh chhuak mêk ni pawhin a lang a, ram vei, a chhe lai siam tha tura luhchilh ngam, politics mual hmun-hnawk phiat fai a, sorkar thianghlim leh entawn tlâk, sum ringawt âtchilh lo leh ram mipuite dinchhuahna tur tak tak atâna bei tur mi tamtak an rawn pên chhuak a, an rawn pên chhuak zêl ang tih pawh a rinawm, chu chuan beiseina thar min neih tir a, politics hi eizawnna leh sum siamna emaw ti tlat hnâwlin, ram siam tha turin theihtâwp i chhuah ang u.
-- Advertisement --
Dik lote hnâwl ngam tur leh,
Pamhamte endawng ngama’n;
Kan ramin min au e, i chhâng dâwn em?
Ram hmangaihtu derte huai taka do ngam turin,
Chanhaite’n min au e, lo chhuak thuai rawh