Award pathum dawn lawmpui

Award pathum dawn lawmpui
Tunhnaia Lunglei district-in hnathawh that avanga India ram pum huapa chawimawina a dawn pathum – Subhash Chandra Bose Aapda Prabandhan Puraskar 2023, Best Police Station of Mizoram 2022 leh National Water Warrior dawngte lawmpuina chu Nilaini khan High Powered Committee Lunglei chuan a buatsaih a. Citation leh sumfai hlan an ni.
Lunglei HPC vice chairman Lawmawma Tochhawng chuan an district atanga ram pum huap chawimawina dawng thei mi engemawzat an nei chu lawmawm a tih thu sawiin, award dawngtute thawhrimna leh inpekna avangin lawmthu a sawi. “Kan hnathawh leh khawtlang hmasawnna tura kan beihna kan inhriatpuia kan infuih phur tlan thin a tul takzet a ni,” a ti.
Lunglei Fire Station-in chawimawina an dawn chungchangah phutlet nei lo leh chawimawi phut loa Lunglei khawpui kang mai thei, mahni nunna chan huama an venghim thei chu ropui a tih thu a sawi a. Lunglei Police Station pawhin Ministry of Home Affairs-in Annual Ranking of Police Stations 2022 a neihah ‘Best Police Station of Mizoram 2022’ a dawng chu an inpekna ropui zia a lantir a ni, tiin, case a awma rang taka an chingfel thin leh, vantlang nen a thawhho an thiam chu ropui a tih thu a sawi.
Sairep VC-ten tuihna humhalhna atana nasa taka hma an la thin leh an hmalakna in India sawrkar beng a thleng chu ropui a tih thu HPC vice chairman hian sawiin, sum an dawn an hmang tangkai tihna a ni bawk tih a sawi a ni.