Sawrkar a tan chuan tuia harsa lo thei kan ni – Vanlalruata

Sawrkar a tan chuan tuia harsa
lo thei kan ni – Vanlalruata
Mizoram sawrkarin mipui tana hma a la tak tak duh a nih chuan tun thalah hian Aizawl khawpuiin tuia harsatna tawk lo thei a ni tih PC president Vanlalruata chuan a sawi.
Aizawl khawpui tana tui lakna hrang hrang, a hmuna a tlawh chhuah vek hnu ah Mizoram sawrkarin mipui tana hma a la tak tak duh a nih chuan tun thalah hian Aizawlin tui harsatna a tawk lo thei tih PC president hian a sawi a. Amaherawhchu, hetianga mipui harsatna awm loa hma la tur chuan sawrkarin huaisen tak leh chak taka hma a lak a ngai tih a sawi.
Tanhril Mualkhang rama SIPMIU-in Aizawl khawpui chawmna tura tui làk hna a kalpui lai chu Nilaini khan PC party hian a hmunah an en a; hna thawh zawh khat tawh niin, hman theih turin khawl an tuaihnuma an enfiah vel mek rualin, tui lak hnaah hian Hunthar Venga leitlahniam bawrah pipeline metre 100 vel siam zawh loh a la awm tih an sawi a. Tui pump-na tur hmunah electric line la thlun luh fel loh a ni tih an sawi.
“Heng hna hmabak awmte hi hmanraw awm fel sa vek tawh a ni a, sawrkarin huaisen leh chak taka hma a lak chuan hun reilote chhunga siam zawh mai theih a ni,” Vanlalruata hian a ti. Kar hmasa khan GAWSS Phase I leh II te a hmunah PC hruaitu hian a tlawh tawh a ni.