Awlsam takin Bawngkawn FC an champion

Life Care Pharmacy ADFA I-Division League final khelh a ni a, 5-0 ngawta an khingpuite sawptu Bawngkawn FC chu awlsam takin an champion. Chawnpui FC sawptu Bawngkawn FC hian pen khatin Mizoram Premier League a hnaih leh sauh.
Final-ah Bawngkawn FC leh Chawnpui FC te inkhel tur hian ngaihven a hlawh a, Durtlang Football stadium a inkhel entu pawh an thahnem viau. Inkhel tan atanga a tawp thlengin Bawngkawn FC an khel tha a, awlsam takin hnehna an chang.
Final a khel tha tak Bawngkawn FC tan hian Lallawmsanga chuan inkhel tan atanga minute 9-na lekah hmahruaina goal a thun nghal. Hma takah goal an thun vangin an phur a, inrintawkna sang zawk nen Chawnpui FC lakah an inlan. Hmahruaina goal an thun hnuin Lalkhawpuimawia chuan minute 28-naah an goal hnihna a thun a, an hmahruaina a tizau.
Si hnih phur tawh mahse goal thun tur khawpin Chawnpui FC an khel tha thei lo. Goal thun mamawh viau mahse chawlhlawk hmain goal hnih an chhuah belh zui leh. Bawngkawn FC tan Dicken RL Malsawmdawnga chuan minute 45-naah an goal lina a thun belh zui leh cheu a, 4-0 ngawta hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau naa goal khat bak a luh belh thei lo. Chawnpui FC in an si phurh sut tum viau mahse an hun tha neih an chhawr tangkai thei lo. Inkhel hmuhnawm takah goal lut a awm belh theih loh reng hnuin Bawngkawn FC in an tawp an khar tha a, Peter Beinachachai Hylchho chuan minute 90+1-ah an goal ngana thunin a tawp a khar. Inkhel hmuhnawm tak a tawp a, Bawngkawn FC an champion zui ta a ni.
ADFA First Division champion hian MPL khel tur zawnna an hmachhawn zui leh dawn a. Champion thar Bawngkawn FC hian MPL 1 khelh ngei tumin tan an khawh zui dawn a, pen khatin MPL chu an hnaih ta phawt a ni.
Life Care Pharmacy ADFA I-Divison League-ah hian Bawngkawn FC tana khel tha thei tak Ricky Lallawmawma chu ‘Best Player’ a ni a. Ramhlun North FC goal thun khawl C Royal Moses chu ‘Top Scorer’ a ni.