Awm thei zat aia tam jail-ah 300+ awm Jail-a thawkte tan lak a ngai – Home minister

Mizoramah jail 10 a awm a, heng zinga 5-ah hian a awm thei zat tur aia tam jail tang an awm a, a vaia chhutin tang awm thei zat tura duan aiin mi 300 chuangin an tam. Hetihlai hian Home minister K Sapdanga chuan jail tang kan thahnem lutuk chu pawi a tih thu sawiin, jail-a thawktute pawhin tan lak thar a tul tih a sawi a ni.Mizoram Prison department record neih danin, kumin November 22 thleng khan Mizorama jail 10 awmah a vaiin tang awm thei zat tura ruahman chu 1386 a ni a, tang awm mek hi 1733 a ni. Tang awm thei zat atanga chhuta tang mek tamna hi 347 a ni.
Jail zawng zawng hi ruahman zat aia tam tang an awm reng lem loa, awm deuh rengna bik jail a awm. Central Jail Aizawl chu tang awm thei zat aia tam tang awm rengna zinga pakhat a ni a, tang 438 awm theihnaah tunah hian tang 807 an awm. Central Jail bula awm Women Central Jail chu tang awm thei zat aia tam awm rengna a ni bawk a, tang 96 awm theihnaah tunah 137 an awm. District Jail pathum – Aizawl, Champhai leh Lunglei pawh tang thei zat aia tam awmna a ni deuh reng zing ami an ni a; tunah pawh heng jail pathumah hian tang awm thei zat aia tam tang an awm vek.
District Jail dang panga – Serchhip, Mamit, Kolasib, Lawngtlai leh Siaha erawh tang awm thei zat aia tam an awm lo deuh reng zawk a ni.
Inrinnia Champhai District Jail tlawhtu Home minister chuan kan state-a jail hrang hrangah tang awm tur zat aia tam an awm deuh vek tih sawiin, “Mihring kan pung chho zel a, sualna pawh a pung ve zel bawk. Jail-a lut kan tam telh telh a, kan rama cheng zat nena khaikhin chuan jail tang kan thahnem hle a, hei hi thil pawi tak a ni,” a ti.
Mi thenkhatten jail atangin a tha zawnga thil zirchhuah an neih laiin, thenkhat chuan an jail tan puite hnen atangin thil tha lo thiam belh an nei thin a. Jail- a thawktute pawhin tan lak thar a tul hle tih a sawi. “Mihring nun siamthatna hmun tak taka chhuah turin taima takin kan enkawlte vil ang u. Mi thahnemngai, pawnlam atanga Pathian thu hriltute, sawrkar department dangten jail tangte hnena thiamthil an zirtir thinte hi a hlut zia hriain jail tangte pawhin lo chhawr tangkai zel se ka duh a ni,” K Sapdanga hian a ti.
Home minister hian SASCI Part IV atangin jail thenkhat sakthatna tur ruahman a ni tih a sawi bawk.