VC inkhawmpuiah term pawh tawi khel dawn

VC inkhawmpuiah term pawh tawi khel dawn
Sawrkarin village council term hman mek a pawh tawi chungchang chu Mizoram pum huap VC inkhawmpui neih turah thu khel ber tur a nih rin a ni.
All Mizoram Village Council Association (AMVCA) chuan naktuk, November 26 hian Aizawlah general conference a hmang dawn a, agenda lian tak pathum a nei dawn. VC term pawh tawi chungchang, VC lawmman tih san leh VC dan thar siam mek thlirho a ni.
The Aizawl Post-in a zawhnaah AMVCA president K Lalngaizuala chuan, VC term pawh tawi chungchang hi a hma pawhin sawrkar hotu thenkhatin platform hrang hrangah an lo sawi tawh a, hei vang hian a rukin an lo ngaihtuah ve fo tawh thin am tha lo an ti hle tih a sawi. VC term pawh tawi hrim hrim emaw, a pawt tawitu sawrkar dinglai do tum vang hrim hrim lam niloin, VC dinhmun derthawng lutuk anga lang thei chu humhim a ngai tih chu VC member tam tak ngaihdan a ni tih sawiin, “Democracy ram kan ni a, ZPM sawrkar a nih vang lam niloin, eng party pawh sawrkar se, chumite sawrkar pawhin an tih kha, tia nakin zela VC dinhmun nghet lo deuha dah theih kha a tha lo thei a ni,” tiin, hemi chungchang agenda-a dah a nih chhan a sawi.
MNF sawrkar lai, Covid len laiin VC term chu pawh sei a lo ni tawh a, hei erawh khawvel huap buaina a nih avangin thil awm lo a ni hran loa, tuna chhuanlam – sum harsatna chu thu tlingah an pawm tlang thei lo deuh nia a lan thu a sawi bawk.