Awmna tur loa awm sipai leh lirthei hawkhawm mek – Home minister

Sipai, a bikin armed battalion-a awm, police lal ten danin a phal chin bak aia tam kawla an awmna tur ni loa an hman leh heti ang thoa hman lirtheite chu an awmna tur dik takah an haw khawm mek tih Home minister K Sapdanga chuan a sawi a. Mizoram thar tan police thar tih chu an rilru ah awm se a duh tih a sawi.
Mizoram Armed Police Association-in Zirtawpnia general assembly vawi 3-na Aizawla an neih a hmanpuinaah Home minister chuan kan sipaite an awmna hmun tur loa awm an awm em tih an sawiho hnu ah, lak an nihna hmun dik taka phur taka awm turin haw khawm siam an rawt tih a sawi.
“Kan officer hah tak tak zingah an ‘entitle’ bak sipai mamawh belh leh lirthei mamawh belh an awm thei a, mah se, kan indaih loh em avangin entitle bak chu kan ti thei rih loah kan ngai. Officer chawl tawhte pawh han induat zui deuh an chakawm viau rualin kan indaih loa, hawkhawm kan rawt ta a ni. Nimin (February 15) a kan thudawnah a haw tur ang kan haw khawm kim thawkhat a, lirthei pawh kan inlakhawm kim tawh niin kan hria a, a lawmawm hle,” a ti. Home minister sawi danin, February thla chhunga let tura inhriattir an nih laiin, thla chanve chhungin an inchingfel deuh vek tawh a ni.
Armed police bik phei chu taksa ‘fit’ a ngai tih a sawi a. DGP nen an inkawmnaa a zawhna a chhan danin, Police department-a post ruak chu 4200 niin, post an luah chin chu 8100 aia tam hret a ni. “Post ruak hnawhkhat turin sawrkarin sum a nei rih si loa, a awmsa hian tha taka kan train a, kan fit phawt chuan Mizoram tan kan va tawk em ka ti,” K Sapdanga hian a ti.
Haw khawm an rawt anga an haw khawm kim hnu ah discipline leh fitness an ngaipawimawh chho leh dawn tih sawiin, “Mitin tan fitness a pawimawh a, sipai tan a pawimawh lehzual. Kan chhehvelah ral hlirin min hual a, in la fit ila, intuaithar ila, kan silaite tuaihnum tharin, ‘New Police for New Mizoram’ tih ka duh a ni,” a ti.
Hotuten sawrkara mawhphurhna an pek tirh phatin ramri an hrut nghal a, drugs lo lut nasa lutuk kaw pui hnawh dan a awm em tih thlithlaiin khawchhak ramria check gate an en a, an kal chhan hian awmzia a neia a hriat thu Home minister hian a sawi. Assam nena inrinaa border outpost (BOP) an tlawh leh a, tlawh rem vak lo 3 tih loh hmun 11 an tlawh tih a sawi.
“Hmun tam zawkah electric current an nei loa, mobile phone signal n nei lo. Chhungte be tur pawhin km.1 a hla kea kal ngai emaw tlang sang deuh pan ngai a ni. Tui connection an nei loa, hla tak ami chawi chawp a ngai. An in erawh tlemin a zia deuh. Ramri hrula sipai, rinawm taka thawkte an mawhphurhna an hria a, kan tlawh hi kan hlawk khawp mai,” a ti.
Ramri hnaiha police duty-te chu civil miten hnawk an ti loa, an lo thlamuanpui em em zawk tih a sawi a. BOP awm lohna khua ten neih ve an duh a, police-te hnathawh hian a ti lawm hle tih Home minister hian a sawi bawk.