Awmni khamin tawngtai dawn

Baptist Church of Mizoram (BCM) Assembly-in ram pumah awmni kham tawngtai rual neih tura a lo pass tawh bawhzuiin, BCM Worship Department chuan September 9 (Inrinni) hian awmni khamin tawngtai rual a nei dawn a. Pastor bial kaltlangin tualchhung kohhran tin chu he Ni hmang tura ngen an ni.
Tawngtai hi chawhma dar 11.00 a tanin, chawhma hun leh chawhnu huna then a ni a; tawngtai thupui siamsa bakah kalkhawm ten tul leh pawimawh an tih te an thawh thei a ni.
Tawngtai thupui ruahman sa zingah – Mizoramah eirukna leh hlemhletna a bo theih nan; kohhran hruaitute leh NGO hrang hrangten inthuruala sual kan do theih nan; kohhran, khawtlang leh chhungkua tibuaitu ruihhlo a rem theih nan; mipat hmeichhiat hman khawloh avanga HIV/AIDS a kian theih nan; khawvelah remna leh muanna thlen theih nan; India ramah rorelna dik a awm a, sakhaw zalenna nei a, chi leh chi inthliarna a tawp theih nan; Mizoram MLA inthlana hruaitu, Pathian tih mi, ram hmangaihtu leh mi rinawm kan thlan theih nan; 2023 MLA inthlan dik leh felfai tak neih theih nan, tih te a tel a ni.