Bad Bunny-a’n tour record a siam
Bad Bunny-a’n tour record a siam
Bad Bunny chuan July ni 22 khan Debí Tirar Más Fotos World Tour a neih kharna show a nei ta a, Billboard Boxscore-in a tarlan danin he tour atanga a sum hmuh hi dollar maktaduai 467.5 a tling a, show vawi 55 a neih chhungin ticket maktaduai 3.1 a hralh thei bawk.
DTMF World Tour hi nikum January-a a album Debi Tirar Mas Fotos support nan a neih niin, he album hi Billboard 200 (US albums) chart-ah pawh kar nga chhung a No.1 thei a, kumin February thla khan No.1 a rawn kai leh zuai bawk. He album-a hla “DtMF” chu Billboard Hot 100 (US singles) chart-ah No.1 kaiin, album-a hla dang pahnih chu top 5 a kai a, a hla dang 14 chart-ah an lang pha bawk a, he album-a hla zawng zawng, hla 17 te chu Hot 100 chart-ah an lang pha vek a ni.
DTMF World Tour hi nikum November ni 21 khan Santo Domigo, Dominican Republic-ah a kick off a, show vawi 55 a nei a, heta tanga a sum hmuh hi dollar maktaduai 467.5 tlingin, chu chu thla riat chhunga a hmuh chhuah a ni a, mipa Latin artist zinga tum khat tour atanga sum hmu hnem ber a la ni. A hmaa he record siamtu chu Luis Miguel Tour 2023-24 niin, dollar maktaduai 409.5 a hmu thei a, he record hi a rawn khum ta a ni.
Hemi hmaa Bad Bunny tour hlawhtling ber chu 2022 World’s Hottest Tour a neih kha niin, he tour atang hian dollar maktaduai 314.1 a hmuchhuak thei.
Bad Bunny hian Latin artist zingah tum khat tour atanga sum hmuh tamah Shakira chiah a pha lo a, Shakira hian Las Mujeres Ya No Lloran World Tour nei mekin, he tour atang hian dollar maktaduai 479.2 (July ni 14 thleng khan) a hmuchhuak tawh a, show a la neih belh nual dawn bawk.
Attendance lamah pawh Bad Bunny hian record a siam a, he tour a show vawi 55 a neihah ticket maktaduai 3.08 a hralh thei a, mipa Latin artist zinga tum khat tour a ticket hralh tam ber a ni. Hetah pawh hian a hmaa record siamtu chu Luis Miguel niin, ticket makraduai 2.9 a hralh thei ve thung.
Bad Bunny hian a rimawi career-a tour a neih tawh zawng zawnga ticket a hralh tawh chu maktaduai 7.1 a tling tawh a, show vawi 274 nei tawhin, heng a tour hrang hrang atanga a sum hmuh hi dollar tluklehdingawn 1.2 a tling tawh a, Latin artist, sap hla sa ngai lo zinga tour atanga dollar tluklehdingawn hmuchhuak thei awmchhun a la ni.