Bagan tana khel tur LZ Chhangte

World champion vawi nga ni thei awmchhun leh Fifa men’s world cup khel kim vek thei awmchhun Brazil first team chuan October ni 3 khian Kolkata khawpuia khelmual hmingthang ve tak Salt Lake Stadium-ah India a infiampui dawn a, Brazilian football ngainatu he khawpui hi a nghing luih luih tawh a, khualtha thleng turin inbuatsaihna tan zui nghal a ni.
October 3 fixture hi a puitlin hunah chuan India leilunga Brazil match hmasaber a ni dawn a, Brazilian Football Confederation (CBF) chuan Kolkata khuaa Fifa international friendly an khelh tur hi ‘historic milestone’ tiin an tarlang a, All India Football Federation (AIFF) pawhin Salt Lake Stadium inkhel tur hi Indian football history-a hun lian leh ropui berte zinga pakhat tiin an chhinchhiah ve bawk.
He match-ah hian India player-te chuan khawvel football-a team khawng berte zinga pakhat ni kumkhua Brazil lakah an tawn phak zen zen loh fiahna vang tak an hmachhawn dawn a; international calendar buai leh chep tak kara Brazil national team-in India an lo lut tur hi Indian football tan chuan mellung pawimawh a ni ang – Neymar Junior chawl hman hlauh mah se!
Kum 1977 daih tawh khan football legend Pele chuan Kolkata hi tlawh tawhin, tuntuma Selecao lo zin tur leh inkhel hial tur hian he khawpui leh Brazilian football inzawmna dai thei tak tak lo chu a rawn chhem-alh thar leh dawn a, iconic yellow jersey chuan City of Joy-ah hlimna a rawn thlen leh dawn a ni!
Salt Lake Stadium-a October 3 international friendly fixture hi AIFF leh CBF chuan karliamta Ningani daih tawh khan nemnghet ve vein, Indian football history-a match lian ber a hmuna thlir tum hian Mizoram atang pawhin ticket chan ngei tum an kat nuk tawh a ni.
AIFF chuan an official X-ah Selecao lo zin tur thu hi tarchhuakin, “History book-a ni thar tur chu tihfel a ni ta. India vs Brazil FIFA International Friendly chu Salt Lake Stadium-ah October ni 3 khian khelh a ni dawn,” tiin.
World number five ni mek South American team hi kum 1992-a Fifa world ranking system kalpui tan a nih atanga India hmachhawn tawha ranking nei sang ber an ni dawn a; Indian football fans tan khawvela star hraw ber ber inkhel lai mit lawnga thlir theihna hun remchang a inhawng dawn a, captain Marquinhos hoa Casemiro, Matheus Cunha, Gabriel Magalhaes leh Endrick tihte’n Kolkata khelmual an luahlum tur hi Bhaichung Bhutia chawl tur thlahna inkhela Bayern Munich leh India team inhmachhawn boruak ai pawh khan lian zawk tura ngaih a ni!
Jawaharlal Nehru stadium-a Bavarians lo zin kha Mizo pahnih Lalrindika Ralte leh Jeje Lalpekhluate’n an lo hmachhawn a; tuntuma Brazilian-ho lo lut tur hi Lallianzuala Chhangte (LZ Chhangte), Lalengmawia Ralte (Apuia) leh Hmingthanmawia Ralte (Valpuia) tihte hian an lo hmachhawn ve leh turah beisei chhin phawt ang!
Tarlan tawh thin angin, September 24, 1977 khan Pele khelhna New York Cosmos leh Mohun Bagan chuan Kolkata khawpuia Eden Gardens-ah historic exhibition match an tih mai chu khelin, 2-2 khan kha tih laia Indian football dinhmun chu a tarlang ve ruaka ngaih niin, a hnu lamah pawh football atchilh khawpui Kolkata hian hming hraw pui pui a lo mikhual tawh thin.
Diego Maradona chuan he khawpui hi kum 2008 khan tlawhin, hero welcome lo pek a ni.
Lionel Messi pawhin Salt Lake Stadium-ah hian kum 2011 khan inkhel tawhin, December 2025 khan fan tour-in Kolkata hi a tlawh leh zuai bawk.
Argentina khan Kolkata khawpuia Fifa international friendly match-ah khan si khat faiin Venezuela an hneh a, kha match kha an ram pawna Argentina captain ni chunga Messi inkhelh vawi khatna a ni nghe nghe.
Legendary Soviet goalkeeper Lev Yashin pawh he khawpui9 hian international tour-in kum 1955 leh 1973 khan a lo hrut tawh a; Germany great Oliver Kahn pawhin a farewell match-ah Bayern Munich tan kum 2008 khan Salt Lake Stadium-ah Mohun Bagan a lo dangchat ve tawh bawk.
Cameroon legend Roger Milla pawhin he khawpuiah bawk hian Diamond Club tan Mohun Bagan centenary celebration tournament a lo khel ve zak zak tawh a, kha mi tum khan Kolkata-ah international football-a player ropui dang engemawzat an inlan bawk.
German top tier club Bochum leh Dutch champion PSV Eindhoven-te pawhin India tour hlawhtling tak an lo kalpui tawh a, Kolkata khuaa football fan-te an nihlawh bik thin ngawt mai!
Brazil hian India an lo luh hmain September ni 25 leh 29 khian Queensland-ah Australia chu friendly match vawi hnih an khelhpui phawt ang.
India international calendarhmabak pawh a lun chho ve hle dawn a, September ni 21 atanga October ni 6 chhungin ASEAN Cup an khel dawn a, Blue Tigers hi Indonesia, Malaysia leh Singapore-te nen group khata an awmho dawn a ni.
Brazil an mikhual hnu November thla khian New Zealand tour kalpui zui lehin, tah hian historic two-match friendly series-ah All Whites nen hian Auckland-ah November ni 12 khian an inkhel ang a, an match hnihna hi Christchurch lamah November ni 15 khian an khel leh ang.