Bairabi-Sairang railway line ….

India ram khawthlang tawp Gujarat state-a naupang kum 12 mi a nih laia rel station vela thingpui zuar (Chaiwala) thin Narendrakumar Damodardas Modi khan, khatih lai khan, ‘India ram Prime Minister i nih hnuah Mizorama Bairabi-Sairang railway line thar i la hawng dawn a ni’ tia hrilhlawktu tawng ta se, a nuih pawh a za peih lovang.
Chaiwala atanga Prime Minister nih theih hi thil awlai a ni lo tih chu kan hre vek; chutiang bawkin tlangram chhengchhe taka rel kawng kaltir talh pawh hi thil awlai a ni lo tih kan hria; mahse thil awlai ni lo hi a lo thleng leh tlat thin.
India ram khawchhak tawp state Mizoram, tlangram chhengchhe ve tak, ruahtui tamna state, lirnghing natna hmun, leilung nghet lo ve tak, rel kawng chhuata phah tur lung chang tha takngial pawh intodelh ve lo hmunah rel kawng Km 51.38 laih nan cheng vaibelchhe 8000 chuang (nuaikhat hlir nuai riat) senga leiverh 48, a sei ber phei chu Km 1.5 aia sei, Lei lian zual 55 leh Lei te deuh zawk 87 awmna, Lei chunga motor kawngpui panga leh Lei hnuaia kawngpui paruk awmna, India rama rel kawng Lei sang ber, metre 114-a sang, phai lam media ten a san zawng sawi nana ‘Qutub Minar aia metre 42-a sang’ tia an sawi fo awmna chu, vawiin hian Prime Minister Narendra Modi chuan Aizawl Lammual atangin a hawng dawn ta a.
Tuna kan Prime Minister, harsatnain a bawhbeh ve theih lohvin tlangram rel kawng thar, puitlin hautak em em mai a hawng tur hi a inhmeh hle a ni.
Hei hi Mizoram chanchinah, hmasawnna bung thar, hmasawnna mellung hrawl tak (historical milestone) a tling a tih theih awm e. He rel kawng thar hian kan rin aia chakin hmasawnna kawng min zawhpui a rinawm a, a chhan pawh inkalpawhna motor kawngpui a chhiat chang pawha rang zawk leh chak zawk, tam zawk bawk thawn chhuah leh lakluh kual zung zung theihna tur a ni tawh dawn avangin leh, man tlawm zawk leh rang zawka zin veivah zung zung theihna tur a nih dawn avangin.
Chutih rualin, he rel kawng thar hian kawng hrang hranga sumdawnna leh eizawnna thar a ken tel dawn avangin, a tir atanga system fel tak hmanga kan lo hmachhawn loh chuan, hmasawnna ruhrel lian tak leh tangkai tak ni thei hi, ram leh hnam tana pawi thlentu a ni zawk hlauh thei tih hi kan hriat nawn fo a pawimawh khawp ang le.