Ball thiam bik tura duan Yamal

Football ngainatuten Pele thiamzia an sawi thin a, Diego Maradona thiamzia sawituten an sawi uar thei viau bawk. Pele leh Maradona te Footballer ropui ber nia ngaitu tam tak an awm reng a, tha zawk thlan chu inhnialna tawp hleithei lo a ni. Pele leh Maradona te hun a liam a, Lionel Messi leh Cristiano Ronaldo te hun a inherchhuak ve leh. Club leh ram tana champion theihna zawng zawngah a champion kim vangin Lionel Messi chu footballer ropui ber a ngaih a ni. Messi leh C Ronaldo te an uaithla a, chuai lam an pan mek. Khawi lam atangin footballer ropui bik rawn chhuak leh ang tih ngaihtuah thup a nih laiin rin aia hmain chhanna kan hmu a. Barcelona leh Spain rawlthar duhawm, Ball thiam bik tura duan Lamine Yamal hun a rawn inherchhuak. ‘Fapa pekin kan awm ta’ tih ang deuh khan football thiam bik pek kan ni ta e!
Kum 18 mi lek ni chunga super star nih tling der tawh Yamal hi July ni 13, 2007 khan Barcelona khawpui huam chhung Esplugues de Llobregat-ah a piang a, a hming pum chu Lamine Yamal Nasraoui Ebana a ni. A nu leh pa Sheila Ebana leh Mounir Nasraoui te hi infiammi an ni hran lo va, a nu hi waitress niin a pa hi building paiter a ni thung. Infiammi ni lem lo mah se football tak mai an ni a, an khawpuia team ropui ber FC Barcelona atchilh bur tute an ni. An fapa Yamal ngei pawh hi Barcelona player ropui Lionel Messi malsawmna an dawn tir a. Messi hian Yamal hi a nausen laiin a bual a, Yamal hi Messi malsawmna dawngtu a ni.
Messi malsawmna dawng Yamal hian football a tuichilh zui ta viau reng a, thiamna ril leh dangdai tak a nei zui ta chiah bawk a. Amah malsawmtu Lionel Messi ang thova thiamna ril pianpui, Pathianni thiamna ril a pek bik a ni. Tuallaia ball a khal leh a rualpuite bula a khel chu a zei hawi em em mai a, kum ruk mi lek a nih laiin football zirna lar La Masia in an hnena training nei turin an sawm. Barcelona hian an academy-ah an la lut fuh hle. La Masia a zawm hnu hian Yamal hian vanneihthlak takin footballer a ngaihsan em em Ronaldinho, Lionel Messi leh Neymar te kiangah hun a hmang thei a, nuam a ti thei hle. Ball thiam ber berte kiangah zir chho a nih vangin hma a sawn chak em em a, a hmasawnna hi a zuanin a zuang a ni ber mai.
Kum 9 chhung Barcelona rawlthar team-ah hun a hman hnuin Yamal hi kum 2023 khan Barcelona B team-ah hlankai a ni a. B team-ah vawi khat chauh a khel hman tihin first team-ah a kaisang zui leh nghal zat. April ni 29, 2023 khan Barcelona first team tan a vawi khatna a khel a, 4-0 ngawta Real Betis an sawp tumin minute 83-naah Gavi thlakin mual chhung a lut. Betis a hmachhawn tum hian kum 15 leh thla 9 chauha upa a ni a. Barcelona senior team La Liga khel thei naupang ber a ni nghal a. La Liga hmachhawn tawh zawng zawng zingah naupan lama pangana a ni ve thung. August ni 20, 2023 a Cádiz an hmachhawn tumin La Liga-ah a vawi khat nan bul a tan a. Barcelona tan bul a tan hmasak ber tum hian khelmual chhunga mipui ten ding chungin zahna chibai an buk hial nghe nghe a ni. Naupang te ni bawk mah se Barca tan a khel tha thei em em a, bul a tan vawi hnihnaah phei chuan assist vawi hnih a nei a, ‘Man of the match’ ah thlan a ni hial nghe nghe a ni.
Khawvela club lian leh hlun ber pawlah naupangte ni chunga bul tan a ni bawk a, Yamal hian record hrang hrang a siam chho mawlh mawlh. Kum 2024 khan Supercopa-ah goal thunin, he inelnaa goal thun thei naupang ber a ni a. Jnauary ni 25, 2024 khan Copa del Rey quarter-final a Athletic Bilboa an hmachhawn tumin goal a thun a, Copa del Rey-a goal thun thei naupang ber a ni zui leh bawk. Barcelona team bikah phei chuan naupan lama record awm zawng zawng a siam thar vek a ni ber mai.
Yamal hian kum 18 a tlin hmain FC Barcelona tan vawi 109 zet khel hmain goal 25 a thun. Khawvela footballer ropui bera ngaih Lionel Messi hi La Masia atanga inzirchhuak tho a ni naa kum 18 a tlin hmain FC Barcelona senior team tan goal a la thun miah lo. Kum 18 tlin hmaa goal thun lamah Cristiano Ronaldo leh Kylian Mbappe te pawhin Yamal hi an phak lo viau bawk a, hei hi Yamal ropui bikzia tifiah lehzualtu a ni. FC Barcelona hi La Liga-ah vawi hnih a champion pui tawh a, Copa del Rey leh Supercopa de España-ahte a vawi khat ve ve a champion pui tawh bawk.
Yamal hi kum 14 mi a nih lai atangin kum bithliah inelnaah Spain ai a awh tan a, Under 15, 16, 17 leh 19 tan a khelh hnuin kum 2023 atangin Spain senior team tan a khel tan. Spain tan hian vawi 20 a khel tawh a, goal 6 a thun tawh. Spain hi Euro 2024-ah a champion pui. Euro 2024-a an champion tum hian Young Player of the Tournament-ah thlan a ni a. A goal thun mawi tak chu Euro 2024-a goal mawi berah thlan a ni tel bawk. Spain tan hian kum 16 leh ni 57-a upa a nih laiin a khel tan a, Spain senior team tana khel thei naupang ber leh Spain tana goal thun thei naupang ber record thar a siam. Euro 2024-ah Croatia an hmachhawn tumin bul a tan a, Euro khel thei naupang ber a niin record duhawm tak a siam nghal bawk.
Kum naupang te ni chunga a chet ropui theih em vangin chawimawina pawh a dawng mawlh mawlh. La Liga-ah kum 23 hnuai lama player tha berah vawi hnih thlan a ni tawh a. Europe a rawlthar thaah thlan niin Golden Boy award a dawng tawh a. Khawvelah kum 21 hnuai lama player tha ber chawimawina Kopa Trophy a dawng tawh bawk. 2024-25 season-ah khan club leh ram tan a chetha em em a, Barcelona chu Spain tualchhungah treble champion a nihpui a. Spain chu UEFA nations League-ah final a hruai thleng bawk. Club leh ram tan a chetthat em vang hian football a chawimawina ngaihhluthlawh ber ‘Ballon d’Or’ dawng thei tura chhawpchhuah zingah a tel hial a. Ballon d’Or dawng thei tura chhawpchhuah tawh zawng zawng zinga naupang ber a ni der tawh a. He chawimawina hlu tak hi a dawng thei a nih chuan Ballon d’Or dawng thei naupang ber a ni zui leh dawn bawk.
Kum 18 mi lek ni mah se Lamine Yamal hi mual chhungah a puitling em em a, a chevel a hmuhnawm thei hle. Inelna lian leh boruak sang tak takah pawh chiai hauh lo, fim leh nuamti takin a inlan thei zel. Khawvela inelna sang ber hmachhawn hnu lawkah mahni khaw khelmualah naupangte nena inkhel ang maiin inelna lianah pawh a tlangnelin nuam a ti thei em em a, a che vel a hmuhnawm hle zel. Hetiang khawpa thiamna ril leh puitlinna, finna leh fimnate hi kum 18 mi lek tan zirchhuahna hun a la awm lo. Zirchhuahna hun la nei lo chunga a nei a, a nunpui tlat si hi mibik a nihna a ni a, a thiamna hi a pek pek, khuanu malsawmna liau liau a ni.
FC Barcelona hi i tan loh zawng tak an ni thut thei a, Spain pawh i ngei zawng; an khel i en peih thak loh pawh an lo ni mai thei. Ball thiam bik tura duan Lamine Yamal chetla i hmu duh a nih erawh chuan Barcelona leh Spain khel hi i tan en hmaih phal chi a ni dawn hauh lo thung. Ball thiam bik tura duan Yamal hi a hma lam hunah eng nge a tawn zel dawn tih a hriat loh a. Tuna a tawn chinah hi chuan ball thiam leh ropui bik bik a ni tih erawh phat rual a ni lova, a ropuina hi sawp nep tum chi pawh a ni lo.