Ballon d’Or dawng tur Messi?

October 30, hian Paris khawpuia Theatre du Chatelet-ah football a chawimawina sang Ballon d’Or semchhuah a ni dawn a. Ballon d’Or semchhuah vawi 63-na tur hi Lionel Messi-a’n a dawng dawn tih a put ru.
September 6, 2023 Ballon d’Or dawng thei tur chhawp chhuah an lo ni tawh a. An chhawpchhuah mi 30 zingah Lionel Messi, Erling Braut Haaland, Kylian Mbappe leh Kevin de Bruyne te an langsar fal. Chawimawina semchhuah a nih hma hauhin a dawng tur a put ru niin tarlan a ni a. Lionel Messi chuan a vawi riat nan a dawng dawn niin tarlan a ni.
Ballon d’Or vawi ruk dawng tawh a, he chawimawina dawng ngun ber ni mek Lionel Messi hi kum 2022-23 chhungin a khel ta hle. Inelna ngaihhluthlawh ber FIFA World Cup-ah Argentina a champion pui a. World Cup-ah hian goal sarih a thun bakah ‘Best player’ ah thlan a ni bawk. World Cup khelh a nih kumah Ballon d’Or dawng turin World Cup-a chethate buk a rit deuh thin a. Hei vang hian Messi hian chawimawina ngaihhlut hlawh a dawn nawn leh rinna lian tak a awm.
Messi hian Argentina tan a chet that bakah Paris St-Germain leh Inter Miami tan pawh a che chhe lem lo viau bawk. PSG tan hian season liam taah khan inelna hrang hrangah vawi 41 a khel a, goal 21 a thun bakah assist vawi 20 a nei bawk a. PSG hi Ligue 1-ah a champion pui bawk. PSG-ah contract a hman zawh hnuin USA club Inter Miami a zawm a, David Beckham-a club-ah a vul zui viau a, inkhel vawi 13 a hmachhawn atangin goal 11 a thun a, vawi nga ngawt assist a nei bawk. Trophy lak la nei reng reng lo Inter Miami hi Leagues Cup-ah a champion pui nawlh bawk. Inelna hrang hrangah a khelh that em vangin Messi hian a vawi riat nan Ballon d’Or a dawng dawn niin tarlan a ni.
Ballon d’Or dawng tura Messi kawl dal thei tura langsar tak chu Norway leh Manchester City forward Erling Haaland a ni. Borussia Dortmund atang Manchester City a zawm hnuin Haaland hian goal a thun nghal zawt zawt a, EPL-ah season khat chhunga goal thun hnem ber record a siam nghal ringawt a. EPL-ah goal 20 thun nana game mamawh tlem ber a ni bawk. EPL leh FA Cup-ah an champion hnuin City hi an la champion ngai reng reng lohna UEFA Champions League-ah a champion pui leh a, tuilet hnu lama a vawi khat nan City hi treble champion an ni. Treble champion an nihna kawnga thawhhlawk tak mai chu Haaland hi a ni a, EPL leh champions League-ah topscorer a ni hial nghe nghe. Ballon d’Or hi Messi kutah a tlu lut lo vek a nih chuan Haaland hian a dawn a rinawm.
French football magazine buatsaih Ballon d’Or dawng tura rinkai zual zingah World Cup 2022-a Topscorer leh PSG tana goal tun hnem ber Kylian Mbappe a langsar viau bawk.