Ballon d’Or ruksak an ni em?

Football a mimal chawimawina sang ber chu France chanchinbu ‘France Football’ in an buatsaih ‘Ballon d’Or’ a ni. Kum khat chhunga player chetha fal, Ballon d’Or dawng ngei tura ngaih ni chunga dawng ta si lo langsar zual an awm a. Hengte hi hi Ballon d’Or an dawn kum turah ruksak ang hialin an sawi thin a, ruksak an ni chiah ang em?
Robert Lewandowski (2020 & 2021)
Kum 2019 – 2020 khan Bayern Munich leh Poland striker Robert Lewandoski hi club leh ram tan a vul hle. Hemi kum hian Bayern Munich hi Bundesliga, DFB-Pokal leh Champions League-ah a champion pui. Treble champion an nih tum hian inelna hrang hrangah goal 55 zet a thun. A chet that em vangin hian kum 2020 a semchhuah tur Ballon d’Or dawng chiang tluka ngaih a ni. Mah se, Lewandoski tan vanduaina chhum a zing a, Covid 19 hripui leng vangin hemi kum ber kher hian Ballon d’Or sem a ni lo. Kum 1956 atanga sem tan Ballon d’Or hi a vawi khat nan sem theih a ni lo a, Lewandoski-a’n chawimawina sang a dawn loh phah.
Kum 2021 ah pawh Lewandoski hi a vul zui leh viau a, Bayern Munich tan inelna hrang hrangah goal 62 thunin, Ballon d’Or dawng ngei tura ngaih a ni nawn leh. Ballon d’Or dawng thei tur chhawpchhuah zingah langsar viau mah se vote 580 a hmu a, Lionel Messi aiin vote 33 in a hmu tlem zawk teh tlat a, Ballon d’Or a dawng lo nawn leh. Hemi tuma chawimawina dawngtu Messi hian , “Ballon d’Or hi i phu tak zet a, i chenna in ngeiah he chawimawina hi kawl tawh ngei tur i ni, i phu tih ka hria, i phu tih kan pawmpui che” tiin Lewandoski hi a hnem hial nghe nghe. Hemi tuma chawimawina sang dawngtu Messi hi lawmpuiawm viau mahse Lewandoski chan tur a ruksak nia ngaitu an awm teuh thung.
|um hnih ngawt rinkai em em ni chunga Ballon d’Or dawng ta lo Lewandoski hian Bayern Munich chhuahsain Barcelona a zawm a. Ballon d’Or dawng tura rinkai zual zinga tel tur khawpin Catalan club lian ah a la invawrh thei ta rih lo.
Virgil van Dijk (2019) : Liverpool leh Netherlands defender rinrawl, lung bang ang maia nghet tlut mai Virgil van Dijk hi kum 2019 khan a vul hle. Southampton chhuahsana Liverpool a zawm tirh season ah Liverpool tan Premier League-ah a inlan zel a, defender ni chungin goal 10 lai a thawkchhuak nghe nghe. EPl point 97 hmuin pahnihna an ni a, champions league final-ah Tottenham hnehin an champion hlauh thung. UCL-a an champion kal kawngah hian mak leh ropui takin Lionel Messi leh a pawlte FC Barcelona an hneh nghe nghe.
Champions League-a an hneh tak Barcelona tan hian Lionel Messi chuan goal 51 a thun a, assist vawi 22 zet a nei bawk. Messi hi mimal takin chetha viau mah se club leh ram tan hlawhtlinna lian a nei lo thung. Heti a nih vang hian Van Dijk hian chawimawina sang a dawn a rinawm hle a, Messi nen an inel tawk viau bawk. Chawimawina dawng ta zawk Messi hian Van Dijk aiin vote sarih chauhin a sang zawk a. Van Dijk zawkin a dawng ta lo hian mak tih a hlawh a, an uipui hlawm viau bawk.
Cristiano Ronaldo (2018) : Cristiano Ronaldo hian kum dangah Ballon d’Or hi a lo dawng tawh thin ngei a, kum 2018 ah pawh hian dawng leh ngei tura ngaih a ni a, chuti chunga dawng ta lo hian mak tih a hlawh hle.
Kum 2018 ah hian Ronaldo hi club leh ram tan a che chhe hran lo. Champions League-ah Real Madrid a champion pui a, UCL ah hian goal 15 lai a thun nghe nghe. UCL-a goal 15 a thun nen hian hemi season hian Real Madrid tan inelna hrang hrangah goal 44 zet a thun. World Cup khelh kum a nih vangin Russia World Cup-ah beisei angin Portugal a thlensanpui ta lo thung.
Kum 2018 hian mak tak maiin Real Madrid leh Croatia midfielder Luka Modric chuan Ballon d’Or a dawng teh tlat. Modric hian club leh ram tan goal 3 chauh a thun a, assist vawi 11 a nei bawk. Russia World Cup-ah hian mak tak maiin final an thleng nawlh a, final-ah France hneh lovin an tlawm thung. World Cup final a khel hi Ballon d’Or a dawn chhan ber nia ngaih a ni zui a. Cristiano Ronaldo zawkin a dawng lo hian mak tih a hlawh hle. Messi leh Ronaldo te hian kum 10 chhung zet chu Ballon d’Or an lo indawn chhawk tawh a. An ni pahnih ngawr ngawrin an dawng bik ninna a awm ve deuh pawh a ni mah se, Modric a rawn lawr tehnawlh dan hi.
Franck Ribery (2013) : Kum 2013 hian Jupp Heynckes hnuaiah Bayern Munich an vul hle a, a vawi khat nan inelna lian pathumah an champion hial. Treble champion an nih theih nan Franck Ribery hian a thawhhlawk hle a, goal 34 lai a thun. Bayern tan hian Thomas Muller, Philipp Lahm leh Bastian Schweinsteiger te chu chetha viau bawk mah se langsar ber erawh Ribery hi a ni. Treble champion hial an nih bakah mimal taka a chetthat em vangin Ribery hian Ballon d’Or a dawng ngei tura ngaih a ni a, mak tak maiin Cristiano Ronaldo in a dawng leh ta tlat thung.
Hemi tuma Ballon d’Or dawngtu Ronaldo hian inelna hrang hrangah goal 55 lai thun bawk mah se Real Madrid hi inelna pakhatah bak a champion pui thei lo thung a. Lionel Messi pawh a lansarh loh kum a lo ni bawk. Chuti chunga Ronaldo in a dawng leh ta si hi Ribery ngei pawh hian a hrethiam lo hle a. “Hei hi chu a fair thlawt lo, ka tan season ropui tak mai a ni a, Ballon d’Or dawn hi ka phu tak zet a ni”, tiin La Gazzetta Dello Sport zawhna a chhang zui hial nghe nghe. A duhtawk mai lo, “vote nei thei tih tam kum a ni a, tawnhriat nei lo mi thar ten vote an thlak a, ka ngaih dan chuan politics taka duhthlanna a ni” a ti zui bawk.
Wesley Sneijder (2010) : Kum 2010 hian Lionel Messi-a’n Ballon d’Or hi a dawng a, inelna hrang hrangah Barcelona tan goal 47 a thun a, assist vawi 12 lai a nei bawk. Barca hi La Liga leh FIFA Club World Cup-ah an champion. Hemi kuma UCL champion Inter Milan tana khel tha tak, Netherlands in World Cup final an thlen theih nana thawhhlawk tak Wesley Sneijder hian Ballon d’Or hi a phu zawka ngaitu an tam hle.
Wesley Sneijder hian Inter Milan chu champions League-ah a champion pui a, semi-final-ah champion lai Barcelona an hneh nghe nghe. World Cup-ah join topscorer a nih bakah World Cup 2010-ah khan man of the match ah vawi li ngawt thlan a ni hial nghe nghe bawk. Heti a nih vang hian Ballon d’Or dawn phu bera ngaih a ni a, Messi a el phak leh lo hian mak tih a hlawh hle a. Wesley Sneijder hian lo dawng ta lo pawh ni se Messi ai chuan Xavi leh Andres Iniesta ten Ballon d’Or dawn an phu zawka ngaih a la ni cheu bawk.
Deco (2004) : Kum 2004 hian Ukrainian striker Andriy Shevchenko chuan Ballon d’Or a dawng a, Ukranian zinga Ballon d’Or dawng thei pathumna chiah a ni. Shevchenko hian kum 2004 chhung hian inelna hrang hrangah goal 36 lai a thun a, mimal takin a chetha viau a, AC Milan chu Serie A leh Suppercoppa Italiana ah a champion pui bawk. Hemi tuma Ballon d’Or dang tura rinkai em em pakhat chu Deco hi a ni.
Decon hian FC Porto chu inelna lian pathumah a champion pui a, Champions League final-ah Monaco an hneh tumin man of the math ah thlan a ni nghe nghe. Hemi kum hian inelna hrang hrangah goal 9 a thun a, assist 25 zet a nei, UEFA Club Footballer of the year-ah thlan a ni hial bawk. Hetiang a nih vang hian Ballon d’Or dawng turin rin a kai hle a, Shevchenko a khum thei ta lo thung.
Thierry Henry (2003) : Arsenal forward ropui Henry hian Ballon d’Or a dawng lo tluan ta hial hian mak tih a hlawh zui ta zel. Kum 2003 chhung hian Arsenal tan goal 24 a thun a, assist vawi 25 zet a nei bawk a, EPL ah season khat chhunga goal 20 chuang thun a, assist vawi 20 chuang nei kawp thei hmasa ber a ni hial nghe nghe. Hemi kum hian EPL-ah uiawm takin an champion zo lova, Manchester United an champion. EPL-ah champion ta lo mah se FA Cup-ah an champion tho thung a, Henry hi PFA Players’ Player of Year leh FWA Footballer of the Year ah thlan a ni. Champions League ah Henry hian goal sarih thun bawk mah se goal hnihin Juventus playe pawimawh Pavel Nedved a phak lo.
Kum 2003 hian Serie A ah Juventus champion pui a, European Cup final hruai thleng bawktu Nedved-a’n Ballon d’Or a dawng a. Football ngainatute thinglungah chuan Thiery Henry-a’n Ballon d’Or dawn a phu zawk reng thung.