Bana Kaih loan rul tha lo an awm lo Kan puala bank neih dan kan zawng – Chief minister

Bana Kaih Scheme kaltlanga loan an pek zingah rul tha lo an la awm lo tih chief minister Lalduhoma chuan a sawi a. Entrepreneur-ten sum puk tur an hmuh zung zung theihnan bank neih tha an ti a. A zirchiangtu tur Committee dinin a taka chantir thuai an tum dawn tih a sawi.
Entrepreneurs’ Chamber buatsaihin Thawhlehni khan Aizawlah Youth Entrepreneurs Summit (YES) 2026 neih a ni a. Hmanpuitu chief minister chuan, Bana Kaih CM Special Package hmangin eizawnna tenaua bultan duh leh an neihsa tilian duh tan sawrkarin kawng a hawng a. Tlema a liantham deuha hma la duh tan loan component an nei a. Bana Kaih thawhpuina chu project tha nei tan chauh a hmuh theih thung a, induhsak emaw thlei bik neia kalpui a ni lo tih a sawi.
“Kan thlen chinah kan lawm a, loan hmutute zingah loan rul tha lo tumah an la awm lo. Entrepreneur tha tan dinchhuah theihna kawng kan hawng a, hetiang scheme tha hi hmun dangah hmuh tur a vang ngawtin kan ring,” a ti.
Bana Kaih duh diltu an thahnem a, a sing tel an ni tih Lalduhoma hian a sawi. A endik chhung a rei a, tunhma anga party fee pe la, tih ang khan an kal loa, endik phawt, dawng tlak nia hriat hnu ah pawisa pek hma in training pek leh vek an ni a, chumi hnu ah monitor zui leh ngar ngar an ni tih a sawi.
“Hetiang hi a nih avangin kum 5 term chhung hian ‘cycle’ tam kan kal hman dawn lo a ni awm mange aw, kan ti a. A process hi duh angin a chak tak tak thei lo,” a ti. Chutihrualin hemi atang hian mi tam tak, mahni chhungkuaa intodelh thei ta hi CM Special Package atang hian an chhuak tawh tih a sawi.
Bana Kaih loan dawng thei turin unit leh block pawmpuina a ngai loa, letter head pawhthlak emaw sawipuitu neih emaw a ngai loa, neutral nih a pawi loa, opposition party mi nih a pawi miah lo bawk, tiin, an project chu a rintlak a nih chuan a tawk tih a sawi bawk.
Awlsam zawka entrepreneur-ten sum puk tur an hmuh zung zung theihnan bank neih tha an ti a. A zirchiangtu tur Committee an din tawh a, a taka chantir thuai an tum dawn tih a sawi. Entrepreneur tam zawk kan neih zel theihnan sawrkarin hma a lakna zirchiang a, a chhawr tangkaitu nih tum turin a sawm bawk.
Entrepreneurs’ Chamber president Joseph L Ralte chuan summit an buatsaih chhan a sawifiah a. Mizo thalaiten entrepreneur lamah tawnhriat an neih a, he huanga zuanglut an tam deuh deuh theihnan he hun hi an buatsaih tih a sawi.
“Mizoramin Industrial & Investment Policy tha tak kan neih tawh avangin he kawnga kal hi a phurawm tawh a ni,” a ti.
Handholding chief executive officer Lalfakzuala chuan Bana Kaih chungchang a sawifiah ve bawk.
Chief minister hian Mizo entrepreneur-te thilsiam chhuah (products) 10 a tlangzarh bakah summit puala innovation challenge an buatsaih lawmman a sem.