Bana Kaih scheme kalpuina atan ‘Peace Dividend’ inpek dan sawi

Bana Kaih scheme kalpuina atan
‘Peace Dividend’ inpek dan sawi
Chief minister Lalduhoma chu Mizorama remna leh muanna a awm theihna atana a tawrhpuina a hriatpuina avangin Bana Kaih scheme-a puihna atan ‘Peace Dividend’ inpek theih a nih leh nih loh Union Home minister Amit Shah chuan a sawipui.
New Delhi-a kal chief minister hian Union Home minister a hmu a. Amit Shah hian, Mizoram chu India rama state ralmuang ber a ni a, a chhuanawm hle tih sawiin, remna leh muanna a awm theihnana Lalduhoma tawrh tawhna a hriatpui tih a lo hrilh. Hemi hriatpuina atan hian Mizoram sawrkar flagship programme Bana Kaih Scheme atana ‘Peace Dividend’ inpek theih a nih leh nih loh an sawidun a ni.
Assam Rifles ram chhuahsan tura building hlui man cheng nuai 523.04 Mizoram sawrkarin a pek ve tur chu Union Home minister hian peksak a inhuam thu a lo hrilh a. Airports Authority of India kuta Lengpui Airport hlan chungchang pawh sawiin, a rang thei ang bera chinfel a tum thu a lo hrilh.
Mizoram DGP atana David Lalrinsanga, IPS a ranglama dah anih theih dan tur pawh an sawidun a ni.
MNF sawrkar laia Mizoram Legislative Assembly-in a lo pass tawh ‘The Mizoram Maintenance of Household Registers Bill 2019’ tun thlenga India President kuta la tang pawh an sawi a. Home minister hian chinfelsak thuai a lo tiam a ni.
Myanmar atanga raltlante chhinchhiahna tur portal Mizoram puala an siam chu peihfel a nih tawh thu a lo hrilh bawk.
Mizo Territorial Army battalion din a nih theihna tura a hmalakna avangin chief minister hian Amit Shah chungah lawmthu a sawi a. Ram venhimna piahlamah Mizo thalaite tana hna siamtu pawimawh tak a ni, tiin, a taka kalpui a nih thuaina turin Intelligence Bureau director nen bawhzui ngai la awmte an sawidun bawk.