Bana Kaih thawh hnihna Sept.20 atangin dil theih

Sawrkarin an bana a kaihsak duhtute tan kumin September 20 atangin a dil theih dawn a, online leh hard copy-in dilna hi thehluh theih a ni dawn.
Mizoram State Policy Coordination Committee chu an chairman, chief minister Lalduhoma hoin Zirtawpni khan an thukhawm a. Pilot phase-a hmalak tawh chin thlirletin, second phase atan an inbuatsaih tan. Second phase hi September 20 atanga dilna thehluh theih beisei a ni.
Pilot phase loan component-ah dilna 11439 a lut a, loan pek theiha pawmsak 668 awmin, endik leh deuh ngai 62 an awm. Hei vang hian pilot phase-a dawng tur zat hi a la danglam thei. A diltute DPR siamsak tur MKVIB a thawn mek 58 a awm bawk.
Adviser to CM (Handholding) Dr KC Lalmalsawmzauva chuan phase 2 atana inbuatsaihna a sawifiah a. Bana Kaih loan component software thar duan a ni a. A diltuin software-in a mamawh data a dahluh kim chuan, software hian DPR a rawn siam chhuak (generate) thei a. DPR siam leh endik lama hun rei tak hman ngai thin chu titawi tura ngaih a ni.
An dil tur trade azirin application form hrang chi 5 siam a ni anga, MKVIB chu line department pakhat anga kal tir tawh tur a ni.
Phase 2 atanga dilna portal thar kalpui a nih dawn avang leh dilna form pawh a danglam dawn a, a diltuten a thara dil vek tur a ni. Nghak khawl loin a lut apiang endik nghal zel tum a ni.