Bana Kaihah hlawhtling zo lo taninhriatthiamna a awm thei dawn

Bana Kaihah hlawhtling zo lo tan
inhriatthiamna a awm thei dawn
Sawrkarin bana kaih tura a thlan zingah harsatna avanga hlawhtling zo ta lo an awm a nih chuan, inhriatthiamna a awm thei dawn tih minister Prof Lalnilawma chuan a sawi.
Tawi bialtu MLA, minister Prof. Lalnilawma hian Saitual district atanga CM Special Package hnuaia an bana kaih tur (progress partner) tana an hriat tul tul inhrilhfiahna leh an sum dawn tur hlan a hmanpuinaah, sawrkar hmasaten mipui hmasawnna tur policy tha tak tak an lo kalpui tawh thin a, sawrkar thar pawhin flagship programme – Bana Kaih duangin, theihtawpin ruahmanna siam a ni a, sawiselna karah tun hun an thleng thei chu lawmawm a tih thu a sawi.
Progress partner te chu uluk taka thlan an ni tih a sawi a. Sumfai tanpuina ‘grant’ a hmanna tur dik taka hmang tura chahin, sawkarin a vil zui reng dawn tih a sawi. Harsatna avanga hlawhtling ta lo an awm a nih pawhin inhriatthiamna a awm dawn tih a sawi a, chutih rualin theihtawp chhuah turin a fuih.
Bana kaih turte hi an trade thlanah technical training pek an ni a, intiamkamna ziahtir nghal an ni a. Training zawhah hian CM Special Package atanga sumfai chu an bank account-ah thun nghal a ni.