Bangladesh-a Zo hnahthlakte ralmuang ta deuh

Bangladesh-a Chittagong Hill Tracts-a Zo
hnahthlakte an ralmuang ta deuh a, Mizorama tlanchhia pawh a hma angin an tam ta lo.
Chittagong Hill Tracts-ah hian Kuki-Chin National Front (KNF) te’n Zo hnahthlakte tan rorelna hran an ngiat a, sorkar kar nan ralthuam an lek a ni. Tun hnaiah sorkar sipaite nena an inkah nasat avangin mi sang chuang Mizoramah an raltlan a, mahse an ralmuan tak deuh avangin raltlan lut thar hi a hma angin an tam ta rih lo.
Thu dawn danin, KNF te hi sorkar lam nen an inbia a, vawi hnih an inbe tawh. Video conference hmangin an inbe phawt a, chumi hnuah November ni 5 khan dawhkan kilin an inbe leh. Hetia an inbiak hnu hian an ralmuang ta deuh a ni.
KNF hian inbiaknaah hian Zo hnahthlakte tana rorelna hran an pu lut a, hei hi an thu ken a la ni reng. Hemi chungchang hi an inbiaknaa an thu chai pawh a ni a, mahse bultan chauh an nih avangin an hlawhtling dawn em tih erawh hriat a ni lo.
An inbiak hnu hian Zo hnahthlak khaw hrang hrang an ralmuang ta deuh a, KNF te leh sorkar sipaite an inkap rih lo. Hei vang hian tlanchhiat pawh a hma angin a ngai ta lo a, mahse Mizorama lut hi chu an la awm nia hriat a ni.
Thu dawn danin, tlanchhiat a ngai tawh lo a, mahse chhungkua an lo inkalsan nasa a, engemaw zat chu an chhungte an raltlan a, chutianga inngaihven tur chuan Mizorama kal an ngai tho.
Chittagong Hill Tracts atanga raltlante hi nikum December atang khan Mizoramah an awm tan a, home department chhinchhiah danin, Bangladesh atanga raltlan, Mizorama awm mek hi mi 1128 an ni.
Sorkar chhinchhiah bakah hian chhinchhiah loh pawh an awm nual a, mahni chhungte bela Mizorama awm mek hi an awm nual. Tun hnaia Mizorama lut tharte pawh hi sorkar-ah an inziaklut lem lo nia hriat a ni a, chhungte ngaihvena kalte an nih avangin a then chuan raltlanah an inngai lem lo tih thu dawn a ni.