Bangladesh-ah Hasina-i thlawptute leh sorkar mite innawr leh

Bangladesh-ah Hasina-i thlawptute leh sorkar mite innawr leh
Bangladesh-a prime minister atanga paih thlak tak, Sheikh Hasina-i thlawptute leh venhim hna thawktute innawr buaina chhuak lehah mi pali thiin mi 50 chuangin hliam an tuar a, thuneitute chuan buaina lian zawk a awm lohna turin venhimna an tikhauh.
Nikuma Hasina-i paih thlak a nih theih tuma a bultumtu zinga mi zirlaiten an din, National Citizen Party (NCP)-in Faridpur-a punkhawm a an huaihawtna tur hmunah Ningani khan police thahnem tak dah an ni tih tual chhung chanchinbute chuan an tar lang a. Heti taka vengtu dah tam hian Hasina-i paih thlak a nih atanga kum khat dawnah pawh mipuiah tanna chi hnih lian tak a awm tih a lang chiang nia ngaih a ni.
Nilaini khan NCP hian Hasini-a chawr chhuahna, amah thlawptu tamna, Gopalganj district-ah inkhawm an lo buatsaih tawh a, a kaihhruai Awami League Party tantuten he inkhawm hi tihbuai tumin an innawr bawk.
Tharum thawhna thlengah hian mi pali thiin mi 50 chuang an inhliam niin police-in an sawi tih tual chhung chanchinbute chuan an tar lang.
Gopalganj-a thil thleng video darhah chuan NCP hruaituten an party-in ‘March to Rebuild the Nation’ an huaihawta tel tura a hmun a thlen laiin Hasina-i tantute hian tiang nen police hmachhawnin an lirthei an halsak tih a lang.
Dhaka Tribune chuan police, sipai leh ramri vengtu 1,500 chuang dah an ni a. Buaina chhuak veng turin ralthuam kengten kawtthlerah patrolling an nei bawk.
Saptawng chanchinbu, Daily Star chuan Gopalganj civil surgeon Abu Sayeed Md Faruk-a’n mitthi a sawite chu Dipto Saha, Ramzan Kazi, Sohel leh Emon an ni tih tar langin damdawi ina thawkten silaimu tuar mi pariat zai an ni bawk tih an sawi tih a tar lang.
Home Affairs Adviser Jahangir Alam Chowdhury chuan police 10-in hliam an tuar ve bawk tih a sawi niin tual chhung chanchinbuten an tar lang a, mi 25 man an ni bawk.
Ninganiah erawh Gopalganj-ah hian district thuneituten curfew an puan avangin kawtthlerte a reh hle a, dawr a inkhar a, lirthei veivak pawh a tlem hle niin Dhaka Tribune-in a tar lang.
Gopalganj-a tharum thawhna thleng hian Hasina-i paih thlak a niha India-a a tlanchhiat hnu kum khat dawnah pawh Bangladesh-ah hian tantu chi hnih nei inepna a la nain an ram hi a inthen phawk nia ngaihna a lian hle.
Hasina-i paih thlak hnua sorkar lailawk ding hruaitu, Muhammad Yunus-a chuan Nilainia Hasina-i thlawptuten NCP inkhawm an tibuai chu ‘an dikna chanvo palzuta tharum thawhna zahthlak tak’ tia sawiin a titute chu hrem lova an chhuah loh tur thu a sawi.
Sorkar chuan tharum thawhna thleng hi Ministry of Home Affairs-a senior secretary Nasimul Ghani-a kaihhruaia chhuitu tur committee dinin chawlhkar hnih chhung hun pek an ni.
Tharum thawhna thlengah hian Hasina-i kaihhruai Awami League Party chuan sorkar an dem hle a, X-ah silaimu tuarte chu an party mite vekj niin a titu-ah sorkar an puh.
Awami League nena an ram inhruai chhawk zak zak thin, Bangladesh Nationalist Party (BNP) pawhin Ningani khan dan leh thupek kenkawh kawnga hlawhchhamah sorkar chu an puh bawk.