Bangladesh atanga raltlante biometric enrollment ti mek

Bangladesh atanga Mizorama raltlan awm mekte chu biometric enrollment hmanga chhinchhiah an ni ve leh a, he hna hi tun hnaia tan niin, an zinga 37% chhinchhiah fel an ni tawh tih thu dawn a ni.
Bangladesh atanga raltlan hi Mizoramah 2436 an awm mek a, biometric enrollment hmanga chhinchhiah hna hi tun hnaia tan chauh ni mah se, an tam loh avangin zawh fel thuai a beiseiawm tih thu dawn a ni.
Bangladesh atanga raltlante hi Zo hnahthlak an ni a, Chittagong Hill Tracts-a chengte niin, an ralmuan loh avangin 2022 kum tawp lam atangin Mizoramah an tlanchhia a ni.
Lawngtlai district-a khaw pakuaah awmtir an ni a, Mautlang, Chamdur P-1, Vathuampui, Parva-III, Hruitezawl, Hmawngbu, Tuithumhnar, Bungtlang South leh Hmunnuam-ahte awmtir an ni. Serchhip district-ah tlem azawng an awm bawk.
Chittagong Hill Tracts-ah hian Kuki-Chin National Front te’n Zo hnahthlakte tan rorelna sang zawk an ngiat a, an sipai Kuki-Chin National Army te leh Bangladesh sorkar sipai an inkap a ni.
He inkahna avang hian mi engemaw zat an raltlan a, kir leh te pawh an awm.
Tun hnaiah raltlan lut thar an awm lo a, Mizorama tlanchhiat tum mi engemaw zat chu kum hmasa lamah khan lo dangin kirtir an ni.
Myanmar atanga raltlante chu biometric enrollment hmanga chhinchhiah an lo ni tawh a, anni hi chu chhinchhiah kim an ni tep tawh tih thu dawn a ni.