Bangladesh palaiin an ram
raltlante hruaikir a duh
Mizorama cham mek Bangladesh ram palai chuan Chittagong biala an ram mi, Mizorama raltlante chu an rama hruaikir leh ngei an duh tih a sawi a. Kuki Chin National Army thil phut mek chu a hlawhtlin a rin loh thu a sawi.
Tripura Agartala-a awm Bangladesh assistant high commissioner Md. Alamin chu Thawhtanni khan Aizawlah thuthar thehdarhtute nen an inkawm a. Mizoram mipui leh pawl hrang hrangin Bangladesh raltlan an lo chhawmdawl avangin lawmthu a sawi.
Mizorama Bangladesh raltlante chu Mizote tan phurrit an nih avang leh an ram mi an nih tlat avangin hruaikir leh ngei a duh tih a sawi a. Chittagong Hill Tract-a Kuki Chin National Army-in state an ngiat avanga buaina an tawh mek chu pawi a tih thu sawiin, an thil ngiat chu a hlawhtlin a rin loh thu a sawi. Bangladesh sawrkar thutlukna tur a hriat loh thu leh buaina chuan engtia rei nge a awh dawn a hriat loh thu a sawi bawk.
Hetihlai hian Bangladesh ram buai zinga khaw pakhata Zohnahthlak awm mekin The Aizawl Post zawhna a chhan danin, Kuki-Chin National Army chu ramhnuaia chet lak thiam tak an nih avangin Bangladesh sawrkar sipaite chu a thi tam zawk an ni tih a sawi a. Hnam tlem zawk leh khawvel hriata an hmingchhiat phah theihna nena inhmachhawn an nih avangin sawrkar sipaite hian beih vak ngaihna an hre loa, khawchhunga awm mipui lakah an tuan phah fo niin a sawi.
Tun dinhmunah raltlan tamna Parva khuaah Bangladesh raltlan chhungkaw 46 awmin, an vaiin member 216 vel an ni a, Parva khuaah hian a theih ang anga inhlawhna an zawn bakah chhungtinin lo tin hnih hmun vel theuh an nei tih Parva YMA president Rinsangapuia chuan The Aizawl Post a hrilh. BCM kohhranin kar hmasa lama tanpuina an pek bak chu tunhnaiah chhawmdawlna dawn an nei lo tih a sawi a ni.
Bangladesh palaiin an ram raltlante hruaikir a duh
Get real time updates directly on you device, subscribe now.