Congress treasurer banna pawm dawn Tul chuan ka insiamtha thei – Lalsawta

Congress treasurer banna pawm dawn
Tul chuan ka insiamtha thei – Lalsawta
Congress treasurer a nihna atanga Zodintluanga Ralte banna thehluh chu an party president Lalsawta chuan an pawmsak dawn tih a sawi.
Banna thehluh pawm tum chungchang hi Thawhtanni khan MPCC president Lalsawta hian vice president Lal Thanzara leh treasurer atanga banna thehlut Zodintluanga, MLA te awm telin thuthar thehdarhtute hmaah a puang a. Pu Zodintluanga Ralte in 2023 April 20 zan dar 7.30 ah treasurer atanga a banna a ziah hi April 21-ah a thehlut a, amah (Lalsawta) hi Delhi-a a zin lai a nih avangin, Delhi atanga a haw hnu, April 25-ah lehkha hi dawngin a hmu ve chauh tih a sawi.
Delhi-a a awm lai hian an party senior-te chuan ‘forum’ ang deuh siamin palai hna an thawk a, an ni hian hmaichhana sawi dun turin thu an rawn a, Pu Zodintluanga hi a lo zinchhuah lai a nih avangin a haw an nghak leh a, a haw hnu ah hmaihmaah an sawidun a, thutlukna siam pawh a tlai phah ta tih Lalsawta hian a sawi a ni.
“MPCC treasurer-in banna a thehluh thut avanga party chhungah chiaina nasa tak a siam hi pawi kan ti a. Hmuntina kan party miin lo ngaithiam hram turin kan ngen a ni. Rilru inpawh tak leh uluk taka kan sawi dun hnuah, kan party that leh chak zawkna’n hetiang hian thutlukna kan nei ta a, amah hi ui tak chungin treasurer nihna atanga a banna hi ama rawt leh duh ang hian pawm thuai nise kan ti a ni,” a ti.
Party-a thawhhonaah ngaihdan inan loh chang awmin lungrual thap theih loh chang awm thin mah se, dawhthei taka an inhriatthiam tlan zel a ngai thin tih MPCC president hian a sawi a. “Kan pahnih inkarah ngaihdan leh duh dan a thuhmun lo a nih pawhin mimal inhuatna engmah kan nei loa, Pu Zodintluanga Ralte hi MPCC treasurer ni tawh lo mah se, party thatna tur chuan theihtawp chhuah a inhuam a, a banna hi pawm a ni anga, a aia MPCC treasurer tur chu kan party hotuten an la ngaihtuah ang,” a ti.
Banna pawm chu tha tih ni mahse, executive an ko anga, treasurer banna thehluh hi an pawm phawt anga, tunge thlak ang, tih chu an ngaihtuah tlang dawn tih MPCC hotu hian a sawi.
“Lehkha chu a thawntu in a thawna hnena a hlan tawh chuan a thawna ta a ni tawh,” tiin, banna thehluh, amah pawhin a hmuh hmaa ama hnen atang ni loa darh vak chungchang Lalsawta hian a sawi.
MPCC treasurer-in a ban chhana MPCC president duhkhawp lohna a tarlan chungchang zawhna chhangin, “Dik a awm anga, dik lem lo a awm ang. A tul chuan kan dik lohnaah chuan insiamthat a tul anga, a tul lem loh phei chuan insiamthat a tul lem loang,” Lalsawta hian a ti.
Party chhunga nihna inpek thar chungchangah elected OB pathum zingah vice president a rawn a, treasurer a lo rawn tel lo chu, rawn tel tul a ti loh vang a nih ber thu a sawi bawk.
Treasurer atanga banna thehlut Zodintluanga chuan zawhna chhangin, party-ah treasurer a nih bakah Legislature Party ah leader a ni bawk a, CLP leader a nihna chu All India Congress Committee-a nihna inkhaidiat danah lal tak a ni tho nen, an party hruaitu – treasurer post chelh kawp kha a tul na kher a awm a hre loa, midang tha zawk chelh tur an awm a rin vanga hetiang thuthlukna hi ngaihtuahna fim tak atanga siam a ni tih a sawi. Congress party atangin a bang loa, banna a thehluh hnu pawh hian party tan a fehchhuak a, tunah pawh party programme fehchhuahna tur hmachhawp mek a awm tih a sawi a ni.