Bank hnathawh dan thlirlet

District Consultative Committee, District Level Review Committee & District Level Security Committee Kolasib chu Ningani khan an chairman, bawrhsap John LT Sanga kaihhruaiin an thukhawm a. Reserve Bank of India, NABARD, line department officer leh Kolasib district-a bank aiawhte an tel.
Thutkhawm hmasa rel tawh hmachhawp bawhzui dan thlirlet a ni a. Mihring cheng 2000 aia tlem awmna khaw 29 zinga khaw 23 amiten bank kalhmang an hriatna tur leh an hman tangkai theihna’n business correspondence dah a ni a; khaw 6 dang chu Indian Postal Payment Bank-in a tuam tawh a ni.
Kumin March thleng khan sawrkar laipui hnuaia hmathatna dawng thei tur, PMJDY-a inziaklut mi 22702, PMJJBY-a inziaklut 8840, PMSBY-ah 16111 leh APY-ah 1037-an awm a. Khaw hrang hrangah Financial Literacy Camp tum 44 buatsaih a ni tawh.
Annual Credit Plan-in kuthnathawktute tihhmasawn nana hmachhawp a siam atanga zaa 96.81 chu tihfel a ni tawh a; crop loan pek chhuah tur erawh bituk zat atangin zaa 49.79 chauh pekchhuah hman a ni. Kum 2023- 2024 chhunga sawrkar sponsored scheme – PMEGP, NRLM leh NULM hnuaiah loan 160 pekchhuah a ni bawk.
Chairman chuan an district-a bank hrang hrangin sum an pekchhuahna tura inkaihhruaina, ‘Annual Credit Plan for Financial Year 2024-25’ a tlangzarh a. Bank-a sum dah luh leh loan-a pekchhuah zat, Credit Deposit Ratio chu za zelah 69.01 niin, hei hi kum hmasa nen khaikhinin zaah 6.43-a pung ang a ni.