Mipuiin sum an dahluh leh mipui tana loan hmanga an luanchhuah lehna, credit deposit ratio hniam lutuk chu tisan turin State Bank of India a beisei tih chief minister chuan a sawi.
State Bank of India chief general manager Vincent leh a thawhpuite chuan Ningani khan chief minister Lalduhoma hi an hmu a. Mizorama State Bank of India hmalakna leh Hand Holding Policy kalpui kawnga thawh dun theihna tur an sawipui.
Chief minister hian SBI credit deposit ratio chu India ram huapa chawhrual 76 a nih reng theih lai a, Mizoram bik 46 emaw vel chauh a ni thin chu a ngaimawh hle tih a lo sawi a. Kan sum deposit tlingkhawm chu keimahni tan hman tangkai a ni tawk lo tihna a ni, tiin, CD ratio sang zawk min neihpui ngei a beisei tlat tih a sawi. SBI sponsor bank, Mizoram Rural Bank-a thawktu indaih lo leh allowances tlem bik an dawng nia sawi pawh lo enchiang turin chief general manager hi a chah bawk.
Bank kaltlanga central scheme kalpui hrang hrang chungchang pawh a sawipui a. Central scheme awm mek leh Mizoram sawrkar Hand Holding Policy chu kalkawp tir tura hma lak a nih thu sawiin, chumi atana bank leh state sawrkar thawh dun dan tur an rel.
Tunhma in central scheme loan chu a dawngtuten hlawhtlin tum vang pawh niloin, subsidy emaw margin money emaw an duh vang maiin an dil fo thin tih chief minister hian a sawi a. An sawrkarah chuan chutiang mite tan chuan beisei a remchang tawh dawn lo, tiin, “Hand Holding Policy nen kaikawpin, kan khaichhuah turte pawh ‘beneficiary’ (a dawngtu) ti tawh loin ‘partner’ (thawhpui) kan ti tawh dawn a. A hlawhtling turte chauh thawhpui kan tum dawn a ni,” a ti.
State mipui tan luangchhuak deuh turin CM-in SBI a chah
Get real time updates directly on you device, subscribe now.
Prev Post
Next Post