Barbie nautelem ngah ber

Barbie collector Bettina Dorfmann, Germany a cheng chuan Barbie nautelem a atchilh tlat mai a, a hmuh theih ang ang a lakhawm zel a, tunah chuan nautelem 18,500 a nei tling tawh a, khawvela Barbie nautelem ngah ber record a siam a sawh nghet zel e. Hetihrual hian a nautelem te chu a hrechiang tawh ngang mai a, a mit an tuam sak chhung pawhin a khawih ringawt pawhin a eng nautelem nge tih a hre thei tawh hial a ni.
Bettina hian a vawi khat nan 2005 khan Barbie 2,500 neiin record a siam a, chu chu duhtawk mai lovin nautelem a hmuh theih ang ang a lakkhawm zela, a khat tawkin a record siam chu a khum zel a, tunah chuan nautelem 18,500 a nei tling tawh.
Bettina chuan, “Ka naupan laiin ka in-Barbie nasa thin a, nuam ka ti thei em em a, ka dahtha zel a, ka fanu tan ka dahtha zui ta zel a. Ka fanu nen chuan kan in-Barbie dun thin,” a ti.
Bettina hian tunhnai khan Barbie kaihhnawih record siam lehin, chu chu mit tuam chunga Barbie thliar hrang hnem thei ber a ni. Bettina hian a mit tuam chung pawhin, a kuta a khawih ringawtin Barbie chu an sam leh fashion atangin engtik kuma an tihchhuah nge tihte a thliar hrang thei a, hetiang hian Barbie 19 chu a hre dik chat chat a ni.