Barbra Streisand-i’n SAG Lifetime Achievement Award a dawng
SAG Lifetime Achievement Award chu Barbra Streisand hnenah hlan a ni a, a award dawn hi Jennifer Aniston leh Bradley Cooper ten an hlan. Streisand hian a award dawn lawmthu sawinaah kum 70 chung zet movies lama a lo tui tawhna te a sawi chhuak a, “Ka tleirawl laiin actress nih ka chak thin a, Brooklyn-a kan chennaah khumah thuin, coffee cie cream dawna movie magazine chiar chungin ka suangtuah thin. A chang chuan school banah, Erasmus High School bul lawka foreign film, black-and-white an chhuah thinna Astor Theater te ka tlawh thin.
“Inrinni tuk khat chu, ka la hre reng mai, Loew’s theater-ah kalin, cent 25 man ticket ka lei a, Guys and Dolls leh oh my God te ka en a, screen-ah khan engkim mai hi a hmuhnawm em em vek mai a. Chutah chuan actor hmuhnawm ber te zinga mi Marlon Brando ka hmu ta. A ralkhat tawih hmasa ber a ni. Amah kha a hmuhnawmin a awihawm em em mai a, Jean Simmons ni loin keimah zawh hi a hmangaih hmasak ber nih kha ka van chak tak. Khatiang suangtuahna khawvel kha ka thil tawn dang zawng zawng ai pawha nuam zawk a ni,” a ti.
Guys and Dolls hi November 1955-a tlangzarh a ni a, chutih lai chuan Streisand hi tleirawl kum 13 mi chauh a la ni a, he film hian lemchan khawvela lut ve turin suangtuahna a neih tir nasa ta hle a, “Film chan ve ka chak thin hle a, mase, screen-a lo lang thin hmeichhe dang te nen kan hmel a inang lo hle mai a. Ka nu phei chuan typing zir mai mai teh, min ti thin a, mahse, a thu ka awih duh bik lo a, tichuan, engtin tin emawni a Pathian zarah a lo thleng dik ta a ni,” a ti bawk.
A film chan hmasak ber chu ‘Funny Girl’ tih a ni a, he film hi 1967-ah tlangzarh a ni. He film director William Wyler hi chutih lai chuan kum 65 mi a ni tawh a, a cinematographer Harry Stradling chu kum 66 mi a ni tawh bawk. Anni pahnih hi Streisand hian a fak hle a, a lemchan zin kawng hawn saktu leh a career atana mi pawimawh an nih thu a sawi bawk.
A lawmthu sawi khar nan Streisand chuan, “He chawimawina ropui tak avang hian SAG-AFTRA chung leh ka actor leh director puite chungah lawmthu ka sawi a, nangni thawhpui che u a, lemchan khawvel a chen hi nuam ka ti hle a ni. A tawp berah chuan screen-a ka lo en che u a hlimna min pek thin avang hian in chungah lawmthu ka sawi bawk e,” a ti.
Barbra Streisand hian lemchan mai bakah rimawi khawvelah pawh award a dawng nual tawh a, he Shrine Auditorium-ah ngei hian Grammy Awards pawh 1970s leh 1980s khan award pathum a lo dawng tawh nghe nghe a ni.