Barcelona boss thar Hansi Flick
Head coach atanga an ban tak Xavi Hernandez thlaktu atan Barcelona chuan Bayern Munich manager hlui Hansi Flick chu kum hnih daih contract an ziahpui tih Nilaini khan an puang.
German national team-a hmun lailum pawh lo chang ve tawh thin Flick hi September 2023 khan Germany team enkawl hna atangin an ban a, hna vawn nei loa a tei ngial hnuah La Liga club hian an team tuaithar leh turin an ruai dawn ta a ni.
Xavi hnuaiah Catalan team hian trophy pakhat eih pawh la loin season an hmangliam hlimhlawt a, chu mi rahchhuahah an head coach chhawr lai chu karliamta Zirtawpni khan an ban a, Barca leh Spain midfielder hlui Xavi Hernandez hian club thuneitute laka a lawm lohna sawichhuakin, a hma kum lama a hnathawhte an hriatsak tha duh lo niin a sawi a, amah thlaktu tur an ruat fel hmain a lo vaukhan lawk a, Nou Camp-a boss thar chu tu pawh ni se a nuamsa dawn lo tih leh tawrhna lian tak a hmachhawn dawn niin a sawi!
Barcelona chuan manager thar an neih thu an puan rualin duh taka an thlanchuah chu an hriatchian tawh leh team a enkawl dan kawngah pawh fak lo hlawh tawh thin, a team enkawl tawhte pawh club leh international level-a hlawhtlinna ropui lo sualchhuahpui tawh mihring a nih thuin an fak.
La Liga club hian kum 59 mi Flick-a hlawhtlin tawhnate tarchhuakin, 2019-20 season-ah khan Bayern chu trophy paruk tehreng – Bundesliga, German Cup, Champions League, German Super Cup, UEFA Super Cup leh Club World Cup a lakpui tih an tarlang.
Tarlan tawh thin angin, tun season liamta maiah khan Barca hi Xavi hnuaiah pahnihna niin, champion zui ta Real Madrid lakah point 10-in an hniam a, Spanish Super Cup final-ah ni se an hmelm aun ber lakah tlawm bawkin, Paris St Germain chuan Champions League last eight atangin an hnawtchhuak bawk.
Boss thar German hian Xavi sawi angin a club tharah hun harsa tak tawk chho ve nghal tura ngaih a ni a; khelmual chhung harsatna bakah khelmual pawn lam neuh neuh a sut tel a ngaih hmel a, chu’ng zingah chuan sum harsatna avanga player duh ang lei theih loh leh kum rei tak daih tawh refereeing scandal tihte a tel ang.
Flick hian 2014 World Cup-ah khan Germany manager Joachim Low assistant niin an ram a champion-pui a; kum 2019-ah head coach ni turin Bayern a zawm a, season hnih chhung lekin trophy pasarih a lakpui hman.
Kum 2020-ah phei kha chuan treble champion nihpuiin, Champions League trophy an chawina kawngah tuna a team ni ta Barca hi 8-2 zetin an sawp nghe nghe.
Kum 2021-a Bundesliga giants a chhuahsan hnuah German national team enkawl tura sengluh niin, tuntum chu assistant ni tawh loin head coach a ni.
2022 World Cup-a world champion vawili ni tawh an ram a chetthatpui zawh loh avangin sawisel a hlawh a, group stage-a an tlak hnu lawk khan friendly match pakhatah an mikhual Japan-in an sawp zui leh nek a, September 2023 khan national team atangin an petchhuak zui ta nge nge a ni.
A club thar Barcelona-a a hrual tur zinga pakhat forward kum 35 mi Robert Lewandowski nen hian Allianz Arena lama season hnih lai lo inzui tawh an ni.
Barcelona boss thar Hansi Flick
Get real time updates directly on you device, subscribe now.
Prev Post
Next Post