Hunthar vs Tuichangral bihchianna

Ather Pro Volleyball League 2024 mipa final chu zanin dar 8 atang hian a hmun ngai LPS Arena, Falkland-ah khelh a ni dawn a, hall chhung luh man hi Rs. 100 a ni ang.
Championship kal mekah Huntharin vawiruk khel tawhin an chak vek a, set khat chiah an la hloh.
Tuichangralin tum li hnehna chang tawhin league-ah vawihnih an tlawm a, May ni 18 khan set thum faiin Huntharin an hneh.
Kum 2016-a Pro Volleyball League kalpui a nih atanga mipa team pahnih tel kim vek zingah Hunthar an tel a; Aizawl pawn atanga tel hmasa ber Tuichangralin kum 2018 atangin season nga an hman zawnna a ni.
Aizawl tlaklam team Hunthar hi kum 2017 leh 2018 an champion a, nikumah TNT ngam loin pahnihna an ni.
Tuichangral hi Pro Volleyball-a an chetthatber chu kum 2018-a pahnihna lawmman an dawn kha a ni thung.
Zanina final khel tur team pahnih hi Pro Volleyball League-ah vawiruk intawng tawhin tum nga Hunthar an chak a, tum khat Tuichangral an chak.
Tuichangralin Pro Volleyball an khelh theihna tura a tir atanga hma latu David Aizampuia Fanai chuan coach a nih hnuah a vawikhatna’n final a luhpui a, semi-final-ah vawiruk an hneh loh zawn tawh champion lai TNT lakah chiang takin team a chakpui thei tlat mai a, head-to-head record-a an thlauh ngawih ngawih Hunthar lakak pawh hian beiseina an nei ngam tura ngaih a ni!