Barcelona khuaa a fate sikul kaina tur hauh fel tawh Messi !?

Barcelona khuaa a fate sikul
kaina tur hauh fel tawh Messi !?
Spain ram chanchinbu lian Marca tarlan danin, Nou Camp club-a kirleh tura sawirik mek Lionel Messi chuan kumin nipui thawt ruala a club hluia letleh tumin Barcelona khawpuiah a fate sikul luhna tur a hauh fel tawh!
Barcelona nena sawizawm leh mek Argentine hma lam hun tur hian sawi a hlawh nasa chho leh mek a, Catalan club-a a kirlehna tur pawh chiang chho zela ngai pawl an awm a; tunkar Nilaini khan Barcelona team chungchang bika ‘specialist’ an tih mai journalist Adrian Sanchez chuan Barca-in an superstar hruaihaw leh tura sum leh sport lama ruahmanna an duanchhuah tawh thu a sawi.
He chanchinbumi hian Argentina captain lalet tura Xavi Hernandez-a team inbuatsaihna hi a YouTube channel ‘Mas que pelotas’ tihah a tarchhuak chuai chuai!
He journalist sawi danin, Messi chhungkua hian Barcelona khawpuia an fate sikul luhna hlui pawh an hauh fel leh tawh a, he sikulah hian August 2021-a Paris an pan hma zawng khan Messi naupangte hian sikul an lut a, tah bawk chuan an fate admit leh an tum niin Sanchez hian a sawi!
Chanchinbumi chuan, “Tunhnai mai khan inbiakna pawimawh tak kan nei a, source hrang hrang ka hmuh atangin Messi chhungkua hian an fate sikul luh thinna bawk kha an rawn hauh fel leh tawh a, hei hian Argentine hawi lam chu a tichiang kuara ngaih niin, Barcelona hmalam hun pawh a hril nghal a ni.
“Ka ngaihdan chuan thil a chiang kuar tawh a, Messi hian Barcelona lam a hawi leh mek a ni,” a ti.
Kum 17 chhung teh meuh a lo tal tawhna club-a Lionel Messi kirleh hun hi a hnai chho zel niin a lang a; Albiceleste star thutlukna siam kawngah a nupui Antonela Roccuzzo pawhin pawimawhna neiin an hria a, a fapate pathum a hrinna khawpui hi Roccuzzo hian a ngaina a, a ngai bang thei lo a, chu chuan Catalan club-a a pasal kirlehna kawng pawh hi a sial chho ruaka ngaih a ni!
Paris Saint-Germain-a Messi contract neih lai hi June 2023-a tawp ve tawh tur hi a ni a, thla hnih vel chauh contract thar ziak tura hun a la neih laiin tun thleng hian contract renewal thawm a la awm lo a, hei hian Barcelona lama kirlehna kawng hi a hawi ve hrim hrim bawka ngaih a ni.
He boruakah hian La Liga president Javier Tebas pawh a tawngchhuak ve tawh a, kumin nipui thawt lai ngeia Lionel Messi senglut leh turin Barcelona chuan dan anga tihfel ngai an neihte an buaipui a tul tur thu a sawichhuak ve tawh bawk.
Tebas chuan, “Messi ruai leh turin Barca hian sum lama tihfel ngai (financial measure) an chinfel a ngai dawn a, an tum ram thleng tur hian tha leh zung an sen nual a ngai dawn.
“Tun dinhmunah chuti maia contract ziahpui thei la ni lo mah se hun an la ngah a, Leo lam hi an hawi leh thei chiang tih chu ka pawmpui a, chumi tihlawhtling tura Barcelona-in ruahmanna an neihte kan hnen a lo thlen hun kan nghak mek a ni.
“Hmabak thawh tur an nei teuh a, an tum tihlawhtling tur chuan an player thenkhat pawh an hralh thei,” tiin duh zat zat player leina atana sum hman theih lohna dan (financial fair play regulations) awm chunga Messi an lakluh theih dan tur a sawichhuak.