Barcelona kutah bawk panish Super Cup lut leh

Barcelona kutah bawk
panish Super Cup lut leh
Jeddah, Saudi Arabia-a Spanish Super Cup final-ah Pathianni khan goal nga luhna El Clasico inkhelah 3-2-in Barcelona chuan nikum final ang bawkin an hmelma lian ber Real Madrid lakah hnehna an chang leh hram a, Catalan club kuta Super Cup trophy tum 16 a luhna a ni ta.
King Abdullah Sport City-a Alinma Bank Stadium inkhelah hian Hansi Flick-a team lamin goal an thun hmasa a, minute 36-a Brazilian forward Raphinha goal hmangin Barca hian half time-ah si khat faiin hma an hruai hlen thei mai dawna a lan hnu chawlhlawk hma hun pekbelh chhungin goal thum tehreng a lut a, goal hnih ve ve thunin chawlhlawk an hmang!
First half hun pekbelh minute hnihna a kal mek laiin Vinicius Junior chuan Los Blancos siphurh a sut zet a; he goal an thah atanga tuibur hmuam da pawh tling loah Robert Lewandowski chuan Barcelona hmahruai nawnna goal a thawh.
Chu tah Gonzalo Garcia chuan Real tan goal a rawn khung chhunzawm ve leh tharh a, half time-ah 2-2-in an inthathen phawt.
Brazilian star Vinicius Jr kha Real tana goal thun harsat mek niin, Pathiannia a goal tihluh kha game 17 chhunga a goal khung leh vawi khatna chiah niin, nikum October ni 4 hnu lama Madrid tana a goal thun leh hmasakber a ni nghal.
Barca boss Flick chuan Real goal hnihna Garcia tihluh hun kha half-time whistle rik hun tawh tiin a protest a, mahse, a hlawhtling zui ta lo a ni.
Second half minute 73-ah Raphinha chuan Nou Camp club goal thumna leh an chakna goal ni zui ta a thawh leh a; hun pekbelhah khup hliam atanga damkawr substitute Kylian Mbappe laka a foul avangin Frenkie de Jong chu straight red card hmanga hnawhchhuah ni mah se Real-in a tam zawk an nihna an hmangtangkai hman ta chuang lo!
Hun tawp dawn lamah hian team pahnihin goal thun theihna hun remchang hmu ve ve mah se Marcus Rashford chuan goal ban sirah a chance neih a thlawh chhuak a; Alvaro Carreras leh Raul Asencio-te’n Barcelona goalkeeper Joan Garcia zawnah tak an ball tha hmuh an chhuih a, goal-ah a tlang zo lo ve ve!
Tun kha kum 2011 hnu lama Barca-in a zawna tum hnih he title an lakna chiah a ni.
Barcelona hi inelna hrang hrangah a zawnin game 10 an chak tling ta a; an tlawm hnuhnunber chu nikum November thla Champions League match-a Chelsea an hneh loh daih kha a ni tawh.
Nikum October ni 26 Bernabeu khelmual El Clasico-a an chak loh hnu khan Spanish club dang lakah an la tlawm leh ta miah lo bawk.
La Liga table lamah pawh Catalan-ho hian hma an la hruai zui mek a, anmahni hnaihbertu Real Madrid lakah point liin an sang mek a; tualchhung league lamah pawh lal an hrawt mek laiin Arab ram lamah lamah season kal laia an trophy hmasaber a hmin leh ta der a, kumin pawh Flick leh a naute puja a fuh chho leh dawn niin a lang!
Tun Pathianni Saudi Arabia ram inkhel ngaihven hlawh kha a zawna Clasico Super Cup tum li an khelhna ni tawhin, Flick-a hnuaia final match bika Barca-in Real an hmachhawn tawh vawi thumah an la chak fai vek a, chu’ngte chu Super Cup vawi hnih leh Copa del Rey tum khat a ni.
German boss Flick hi final match bika chak thei tak mai a ni ve reng reng a, a tel tawhna final match riatah la chak fai vekin, chu’ng zinga match nga chu Bayern Munich a enkawl lai a ni.
Los Blancos ve thung hi season kal laia an La Liga match khelh hnuhnung vawi ruka vawi li chak niin, league leh Europe-ah an mar pat thei bik lo a, hei vang hian Madrid-a Xabi Alonso hmalam hun pawh a derthawng mek a ni.
Ti chuan, Spanish Super Cup bikah kir leh tawh ila.
Team pali inelna he Super Cup hi kum 2020 atang khan Saudi Arabia ramah hian nghah tan niin, Spanish Football Federation leh Arab-ho inremna hi pawhsei niin, kum 2029 thleng he ram hian Spanish Super Cup a thleng zui dawn a ni.