Bawlhhlawh khawntu lirthei neitute tlan loh tum an thulh

Aizawl khawpuia bawlhhlawh khawntu lirthei neitute harsatna chu ngaihtuah lai mek a nih bakah hmaichhana sawipui an tum avangin vawiin – September 23 atanga bawlhhlawh khawn loh an tum chu an thulh lailawk.
Aizawl Garbage Vehicle Owners’ Association, PPP Mode Bawlhhlawh Paih Welfare leh Sanitation Driver & Handyman Association chuan bawlhhlawh paih lirthei hman man rualkhai leh mumal zawk, vengtin hlat dan mil zela siamtha tura vawi engemawzat AMC hotute an ngenna chuan awmzia a neih loh avangin a nawrna atan September 9 atangin an lirtheiah flag dum an tar a, thuneitute atanga an beisei ang an hmuh loh avangin tiamchin awm loa din vek tur, tih an rel ta tih an sawi.
September 22 – Pathianni khan Aizawl mayor Lalrinenga Sailo hoin an sawiho a, AMC-in rate rualkhai lo siamtha turin a rang thei ang bera hma lak an tum thu an sawi chu ringtawkin, tiamchin awm loa bawlhhlawh lakkhawm loh an rel tawh chu an thulh tih an sawi a ni.
Aizawl mayor Lalrinenga Sailo chuan Aizawl khawpuia bawlhhlawh khawn rate hi a khat tawkin AMC hian a san thin a, diesel man sang ta lutuk leh senso sang zelah bawlhhlawh paih lirthei chhawrna rate pawh ennawn leh tum mek a ni tih a sawi a. “Bawlhhlawh paih lirthei hi PPP mode-a kalpui a nih avangin mipui pawisa thawh tur pawh a nghawng tel dawn a, AMC sum dinhmun leh mipui lam thawh ve turte uluk taka chhutfel a tul a, hmanhmawh taka tih mai a harsa a ni,” a ti.
Hemi chungchangah hian garbage vehicle pawl hruaitute nen pawh inbiain, AMC-in an lirthei a chhawrna term a tawp tawh avangin term thar kal dan turah thutlukna siam tum mek a nih thute sawipui an ni a, a rate tihfel nan term thar nghak hram turin AMC chuan a lo ngen tawh tih a sawi a ni.