Bawlhhlawh paih man pe turin Finance hotute ka hrilh – CM
Aizawl khawpui bawlhhlawh paihtu lirtheiten an lirthei hman man an hmuh loh rei tawh nawrna atana tlan loh an tintuah mek chungchangah chief minister chuan Finance department hotute hnenah hemi atana sum pekchhuah turte pe turin a hrilh tawh. Aizawl mayor Lalrinenga Sailo leh a thawhpui dangte chuan Nilaini khan chief minister Lalduhoma a pisaah an kawm a. Lawmpuina hlanin an mamawh thil hrang hrang an sawipui. Chief minister hian tunhnaia Aizawl bawlhhlawh paihtuten an bawlhhlawh paihna man an hmuh loh rei avanga din an ngaih mai theih thu a lo hria tih sawiin, a hriat ruala Finance department hotute bia in, Aizawl Municipal Corporation bawlhhlawh paihna sum pek chhuah tur awm angte pe chhuak tura a hrilh nghal thu a lo hrilh.
Aizawl bypass road chhuah lam leh tlak lamah a awm thar thuai dawn tih sawiin, chu chuan nasa takin Aizawl khawpui a zauh dawn a. Chhuah lama bypass road thawhna tur phei chu Union Minister of Road Transport & Highways-in a sanction tawh tihte lo hrilh bawkin, Aizawl zauh zel nana hmalakna awm dangte nen a sawi a ni.
Chief minister hian bawlhhlawh paihna neih belh kan mamawh hle tawh tih a sawi a. Tuna SASCI atanga Hualngohmuna Solid Waste Management Centre thawh mek, Smart City Fund atanga Luangmual Industrial Growth Centre-a thawh mek chu uluk takin an vil dawn tih sawiin, “A hunah, a nihna tur ang taka an zawh ngei kan phut dawn a. Sihphira thawh tur pawh chutiang bawkin kan umzui ang,” a ti. Aizawl Solid Waste Management Centre siam belh mekte an ngaihven thu a lo hrilh a ni.
Mayor leh a thawhpuite hian Aizawl khawpui zauh zel tura hma lak a tulna, sawrkara an dinhmun (status) hniam lutuk, an lawmman beitham lutuk leh state danga anmahni ang corporator an phak loh dante an thlen a. Central lama Urban Local Body Fund tam tak haichhuah tur awm chu tun aia nasa zawka haichhuah dan a awm theih thute pawh an sawi a ni.
Chief minister hian an dinhmun siamthat an mamawhna, India ram hmun danga corporator-te nena an dinhmun khaikhinna leh lehkha pawimawh dangte ziaka a hnena thlen turin a lo chah a ni.