Bawlhhlawh sawngbawl tur khawnna atan khaw 4 tan lirthei 7 semchhuak

Swachh Bharat Mission (Grameen) Public Health Engineering Department (PHED) buatsaihin Project Management Unit (PMU) PHED office hmun MINECO-ah bawlhhlawh khawnkhawmna tur lirthei (Solid Waste Collection Vehicle) chu July 24 khan PHE minister Prof. Lalnilawma hoin a dawngtu turte hnenah hlan a ni.
Bawlhhlawh khawnkhawmna tur lirthei semchhuah tak chu faina kawnga hmalakna pawimawh tak a ni tih PHE minister hian a sawi a. Mizote chu faina kawngah hma sawn viau tawh mah ila, zir tur kan la ngah tih sawiin, “A langah chuan kan changkangin kan fai viau tawh a, a lang lo lamah erawh kan la fai tawk lo hle. A langa kan fai ang hian a lang lo lam, kan chhehvel fai tel se, kan lui tui nu pawh a zia deuh anga, lui dunga plastic um leh polythene len thla tam lutuk hi a ziaawm deuh dawn a ni,” a ti.
Sawrkarin faina lam hawi infrastructure a bun chu mipui ta a nih angin, a enkawl zui hna pawh khawtlangin mawhphurhnaa an lak a ngai tih a sawi a. Hengte hi a hlawhtlin theihnan Village Water & Sanitation Committee kutah mawhphurhna tam zawk a awm dawn tih a sawi.
Bawlhhlawh phurhna lirtheite chu a thlawna pek an ni a, tangkai taka hmangin a enkawl zui leh vawnthatna tur (maintenance fund) chu khawtlangin an lo insiam chawp a ngai a, sawrkar leh mipui an thawkho zel dawn tih a sawi a ni.
Nikuma thingtlang khua hmasawnna tur, LAD hmalaknaa Sustainable Development Goals tehna zinga pakhat “Clean and Green Village” ah Kawrthah North Village Council chu India ram pumah pakhatna niin, sumfai lawmman vaibelchhe khat an dawng a. All India-ah pawh pakhatna hial an ni thei tih a sawi. Khaw dang pawhin thahnemngaia hma an lak chuan an ti ve thei tih sawiin, PHE Department hnuaiah faina leh tui thianghlim in tur ngaihtuah kawngah theihtawp chhuah turin a fuih bawk.
SBM-G hnuaia bawlhhlawh sawngbawlna kalpui meka hman tur lirthei 7 chu minister hian a vailiam a. Lirthei hi RD Block pahnih huamtu Aibawk Plastic Waste Management Unit, RD Block pathum huamtu Seling PWMU, RD Block pathum huamtu Serchhip SWMC leh RD Block pakhat huamtu Kawlkulh PWMU ah hman a ni ang.
Tun dinhmunah PHE department enkawl SBM-G Mizoram hnuaiah hian hmun ngaah mumal takin bawlhhlawh sawngbawl mek a ni a. Aibawk PWMU, Seling PWMU, Serchhip SWMC, Kawlkulh PWMU leh Thaizawl PWMU an ni. Heng sawngbawlna hmun hian a vaiin khua 87 a huam mek a, khaw tam zawk huam tura hmalak mek a ni.
Heng bawlhhlawh sawngbawlna hmun hi private operator leh Village Water & Sanitation Committee enkawlna hnuaiah mipui atanga user fee tlingkhawm hmanga enkawl mek a ni. Mipui atanga user fee hi duh anga hmuh that a nih thin loh vangin bawlhhlawh sawngbawlna hmun hian harsatna an tawk thin a, bawlhhlawh phur lirthei pek an nih chuan harsatna an tawh thenkhat chu a chhawk zangkhai rin a ni.
Lirthei semchhuah rual hian heng bawlhhlawh sawngbawlna hmunin a huam khua zinga bawlhhlawh thliarhrang tha leh user fee pe tha thlanchhuah khaw 25-a dah turin vantlang bawlhhlawh bawm 688 sem tel a ni.