Ni hnih cham turin Modi-a’n Israel tlawh

On Feb 26, 2026 19 0

Ni hnih cham turin Modi-a’n Israel tlawh
Indian Prime Minister Narendra Modi chuan ni hnih cham turin Israel a thleng a, hei hi ram pahnihte inlaichinna thuk zawka kalpui theihna hun remchang atan an hmang a, hetih lai hian US leh Iran inkara sipai lama buaina chhuak mai thei tur chungchangah boruak a sang mek bawk .
Hindu nationalist Modi-a hi kum 2017 khan India chanchina prime minister zinga Israel tlawh hmasa ber a ni a, Prime Minister Benjamin Netanyahu nen hmarchhak lawng chawlhna khawpui, Haifa-a tuipui kam an fang kual.
Kum kua dawn a liam hnuah pawh thuneihna an la chelh ve ve a, Israel-in sipai thil thawnchhuah tihpun a tum lai hian artificial intelligence bakah ram venhimna chungchangah pawh inbiakna neih a nih beisei a ni.
Israel sorkar thuneitu sang chuan he intlawhna hian ‘huang hrang hranga thawhhona thar a hawnsak dawn’ tih a sawi a. Ram pahnihte inlaichinna chu nasa taka tihchangtlun a nih dawn thu Israel foreign ministry thuneituin a sawi.
Modi-a hian Israel parliament, Knesset-ah thu a sawi a, Israel-in Holocaust hriatrengna hmun a siam, Yad Vashem-ah pangpar a dah bawk.
Modi-a zin hi US-in Iran a beih mai theih kara Iran tuipui kama lawng sipai rual a dah lai a ni a, ram pahnihte hian Tehran nuclear programme chungchangah inbiakna an neih chuan rah ṭha a chhuah lo hle a. Pentagon chuan Mediterranean-ah thlawhtheihna phur lawng a dah a, Israel tuipui kam a pan dawn a ni.
US-in Iran a beih chuan Iran hian phuba à la mai thei a, Israel bakah Gulf Arab ram-a US sipai hmunte pawh a bei thei a, heng hmunah hian India mi maktaduai tam tak an cheng a, hna an thawk a, kum tin dollar tluklehdingawn tam tak an thawn chhuak ṭhin.
India think-tank Observer Research Foundation-a mi, Kabir Taneja chuan New Delhi-in he biala buaina a awm hi a duh loh thu a sawi.
“Chutiang thu chu tun hmain an lo thlen tawh a, he tlawh chhung pawh hian an rawn thlen ngei ka ring,” a ti.
Israel foreign ministry hotu chuan Modi-a’n a tlawh chhung hian ‘an huam chhung thil thleng mek thlir chungin’ inbiakna neih a nih a rinawm thu a sawi.
Netanyahu chuan, “(Kan) thawhhona hian rah ṭha tak a chhuah thei a, kan chhelna leh kan hmalam hun tur a tichiang thei a ni,” a ti.