K.Hmingthankaia
-- Advertisement --
Ni 6-11-2024 khan, Zuangtui kal turin Chandmari atangin chhun dar 12 velah Ramhlun lam tlan Bus-ah ka kal a. Bawngkawn kan chhuah phei dawnah chuan kan ding ta reng mai a. Kan chunglam Chaltlang kawnga kal chhuk leh chhote, kan hnuai lam Ramhlun kawnghnuaia kalte, kan side lo lam, min tawk zawnga kan sira kalte chu an che reng a, keini chu kan che ve thei reng reng lo mai a. A kawn lai tak, traffic police duty-na lah kan hmu ve pha chiah si lo. Minit 30 vel hnuah chuan kan tawlh hma ve deuh ta a. Duty pawh kan hmu pha ve ta tihah chuan kan ding leh ta ngat ngat mai a. Police duty chu pakhat chauh niin a vir buai ngang mai a, kawngah a vir kual tawn sek a, side hran hran ami chu hmanhmawh tak takin a vai zung zung a, mahse, keini lam chu a hawi pawh a lo hawi duh reng reng lo. Bus-ah chuan pali panga bak kan awm tawh lo, an chhuk zo tawh. Engtiziaa keini chu min hrem bik ngat ngat chu ni maw, tiin kan phun sap sap a. Bus driver chu chhukin duty bulah chuan enge mawni hi a va sawi a ni.
Chutah traffic police chu thinrim em emin kan lam panin, driver chu kut zungchala rawn kawk chungin a lo phei, a rawn ang ta chiam a. Kan hmaah chuan taxi pahnih chiah an ding a, chumite chu kaltirin keini chu min dintir a, “Chief Minister a lo kal dawn, an ti a, ka dintir che u a nih hi. Engmah hre lovin engatinge thil in lo sawi ve” a ti tan tan mai a. Keiin, ‘Chu pawh ni se, line dang an che reng a, engatinge keini chauh kan din reng’ ka tih pawh chu min chhang chuang lovin, ang chungin kawngah chuan a kal let phei leh ta zel a. Keini pawh chu min kaltir ni chuang lovin kan kal phei ve ta zel a. Duty-pa thinrim laklawh tawh chuan signal a vai lai pawh chu ngaihsak hleithei tawh hek lo, kan chuanna bus numberte chu a ziak kai thul. Vai driver a mansa niawm tak chuan a lo be buai ve reng nen, ama min tihdin pawh ni ni lovin, jam vangin duty post bulah chuan kan ding leh ta reng a. A tawpah chuan engtin tin emaw kan tlang thei ta hram a ni. Darkar khat zet kan tangkhan chhung chuan a CM ber pawh chu, khawi zawng mah chuan a lo kal lem hlei lova.
Chuta ka rilrua thil lo awm chu-
1. Sawti khawpa kawng pengthuam lun laiah sawn engatinge traffic police pakhat chauh a duty?
2. Heti khawp hian a ni maw kan Minister-te chevel hian mipui an lo la tihbuai fo?
3. Bawngkawn Sairang pengthuam leh Durtlang pengthuam inkar chauh tal hi chu motor kawng chhawng a siam theih hram lo maw? Motor kalna tur a siam theih loh a nih pawhin, mihring kalna tur tal chu siam dan a awm mai lo maw?
4. Pu Zorama chuan kawng chhawng ban phunna tur hial a kawk thei a, ZPM hian saw lai pengthuam pahnih inkar tal saw kawng chhawng siam tumna tal in nei ve em?
Sawrkar hian Bawngkawn phei mipuiin harsatna namen lo kan tawh rengna saw tih ziaawm tumna leh, hmalak mekna thui tak a lo nei tawh a nih chuan, mipui hi min hrilh ve sela, tichuan, sawlaia harsatna kan tawh chang pawhin, nakin thlir chungin rilru a dam deuh mahna.
Tin, chutiang project a lo awm a nih chuan, in theihna, in thiamna, in finna zawng zawng hmangin, tha taka tihhlawhtlin tumin han insawrbing teh u. |ha taka in puitlin thei a nih chuan, in tan leh Mizoram tan ‘Mel lung’ pawimawh tak in phun a ni dawn si a. Chuti a nih loh chuan, sawlaia harsatna tawh apiangin, he ka thu ziah hi thunawna hmangin, in thlavang kan tawng reng mai dawn a ni.