Bawrhsapin ramri hrul a tlawh

Kolasib district bawrhsap H Dolianbuaia chuan Nilaini khan Vairengte leh a chhehvela sawrkar hmun pawimawh leh ramri dinhmun a tlawhkual.
National highway four lane laih mek chu Vairengte thlengin a enfiah a . NHIDCL hotuten lo dawngsawngin, hnathawh dan leh hmasawn dan an lo hrilhfiah a, an mamawh leh chak zawka hna thawh theih dan tura rawtna an thlen nghal.
Bawrhsap chuan four lane siamna daltu hrang hrang – arbitration leh court case pawh a ranglama chinfel thuai a nih theihnan mahni zawn theuhah CALA Kolasib leh NHIDCL chu ngaihtuahna seng turin a chah.
3rd Battalion MAP tlawhin ramri venhim chungchang leh an mamawh a sawipui a. 1st Battalion IR Vairengte tlawh lehin an camp mamawh leh thil pawimawh an sawiho bawk. Assam leh Mizoram ramria 5th Battalion IR duty-te awmna hmun, Sabual tlawhin, ramria buaina leh harsatna an tawh thin sawiho a ni a. Ramri vengtute inpekna fakin, huaisen leh taima taka hna thawk zel turin a fuih.
Vairengte Community Health Centre (CHC) a tlawhnaah bawrhsap hi doctor leh nurse-te nen an inkawm a. Vairengte CHC-ah hian medical officer 1, AYUSH doctor 2, dental surgeon 1 leh thawktu dang an awm a. X-ray khawl thar leh hmanraw tangkai tak tak a awm bawk.
Bilkhawthlir-a Eklavya model Residential School tlawhin, zirlai – pawl 6 atang a pawl 9 mi 200 chuang an awm a; school naupangte leh zirtirtute fuihin thu a sawi a ni. Bilkhawthlir-a BDO office hmunhma a tlawh nghal a ni.