Bayern hmakhalhin a lerah Dortmund

On Apr 24, 2023 26 0

Bayern hmakhalhin a lerah Dortmund
Sili fai tehrenga an mikhual Eintracht Frankfurt sawpin Bo-russia Dortmund chuan league game nga chauh khelh tur awm tawhah Bundesliga table-a hmahruaitu Bayern Munich an nekchhuak a, season tawp hnaih tawh lam heti ang stage-ah 2011/1 season hnu lama hma an hruai vawikhatna a ni.
Kum 2011/1 sea-son kha Dortmund-in German top flight title anlak hnuhnunber niin, kumin hi an cham-pion kum ni leh thei tak ang maw?
Inrinni zan inkhel-ah Jude Bellingham chuan minute 16 an khelh tlin rualin Boru-ssia Dortmund hma-hruaina goal a thun a, England midfielder Bellingham-a goal hi corner atanga intan niin, Julian Brandt siamsak a ni.
Donyell Malen chuan minute nga an khelh tlin leh rualin Dortmund goal hnihna a thawh a, half time hma lawkin Mats Hummels chuan home team goal thumna a khung ve leh.
Second half minute 66-ah Malen bawkin he game-a a goal hnihna leh sili faia Dortmund chakna goal thawh lehin, an kawtkaia an point thum thawhchhuah nen inkhel danga point hlawhchhuak zo lo Bayern Munich an lehpel ta a ni.
Mainz 05 3-1 Bayern Munich
Tarlan tak angin, hmahruaitu Bayern hian Dortmund khelmual luh hmain Inrinni vek khan Mainz an luhkhung a, table-a parukna luahtu team hian rin loh takin Bundesliga giants an hneh nawlh a, Munich club hi Bundesliga season kal laia an vawili tlawmna chiah a ni.
He inkhelah hian tunhnaia a team-mate nena intibuai Sadio Mane chuan Joao Cancelo ball vawrh tauhlutin mikhual team-in hma an hruai zet a, Mainz hian chawlhlawk hmain an siphurh an sut hman lo nghe nghe.
Hremna a tawh hnua starting line-up luah chho leh ta Mane hian goal khat dang thun leh mah se VAR endik a nih hnuah offside vangin hnawlsak a ni.
Bavarians hi nuamsaa chak tur leh an hmahruainahum zui thei tura beisei an nih laiin second half-ah minute 14 lek chhungin goal thum tehreng an chhuah tling a, Borussia Dortmund lakah an hmahruaina an hloh ta hial a ni.
Mainz 05 tan Ludovic Ajorque chuan minute 65-ah an siphurh sutna goal tilutin, Leandro Barreiro leh Aaron Caricol-te’n mualneitu team tan an khung belh a, Thomas Tuchel-a team-in kutbengin khelmual an chhuahsan!